गोरखा सैनिकहरूको वेलफेयर र पेन्सनबारे आज अलग-अलग वार्ता

लण्डन । गोरखा भूतपूर्व सैनिकहरूको कल्याणकारी व्यवस्था र पेन्सनबारे नेपाल सरकार, बेलायत सरकार र गोरखा भूतपूर्व सैनिकहरूका प्रतिनिधिहरूबीच आज अलग अलग वार्ता सम्पन्न भएको छ ।

बेलायती रक्षा मन्त्रालयमा भएको वार्ताको पहिलो चरणमा कल्याणकारी व्यवस्थाबारे छलफल भएको थियो । बिहान १० बजेदेखि १२ बजेसम्म भएको सो छलफलमा गोरखा सैनिकका तर्फबाट गोर्खा भूतपूर्व सैनिक संघ (गेसो) का उपसभापति धर्मबहादुर तामाङ र नेपाल भूतपूर्व सैनिक संघ (बिजीनेसा) का सभापति केशबहादुर गुरुङले गोरखा सैनिहरूको वेलफेयरका बारेमा विभिन्न बुँदाहरू प्रस्तुत गरेका थिए ।

वार्तामा सहभागी गुरुङले आफूहरूले गोरखाहरू र उनीहरूका सन्ततिलाई नेपालमा बसोबासमा सहयोग गर्नुपर्ने, भूतपूर्व सैनिकका छोराछोरीहरूलाई बेलायतले छात्रवृत्ति दिनुपर्ने, नेपालमा बसोबासरत गोरखा र उनीहरूका परिवारहरूलाई निशुल्क स्वास्थ्य सुविधा दिइनुपर्ने, हालसम्म गोरखा भूतपूर्व सैनिकहरूलाई गोरखा वेलफेयर ट्रष्ट नामक च्यारिटीबाट स्वास्थ्यसेवा दिइँदै आएकोमा रक्षा मन्त्रालय र राष्ट्रिय स्वास्थ्य सेवामातहतबाट दिइनुपर्ने कुरा उठाएको जानकारी दिए । उनले नेपालमा बसोबास गरिरहेका गोरखा भेट्रानहरूलाई बेलायतमा दिइँदै गरेसरह सुविधा दिनुपर्ने, विधवाहरू तथा च्यारिटी पेन्सन पाउनेहरूका बारेमा पनि आफूहरूले आवाज उठाएको उनले थपे ।

वार्तामा सहभागी गेसो उपसभापति धर्मबहादुर तामाङले वार्ता सौहार्द्धपूर्ण वातावरणमा भएको र आफूहरूले गोरखा भेट्रान तथा उनीहरूका छोराछोरीका लागि विभिन्न सवाल उठाएको बताए । आफूहरूले उठाएको सबै कुरा बेलायत सरकारका प्रतिनिधिहरूले टिपोट गरेको र ती विषयमा अध्ययन गरी अर्को चरणको वार्तामा आफ्नो धारणा राख्ने उनीहरूले बताएको पनि तामाङले जानकारी दिए ।

त्यस्तै, दोस्रो चरणको वार्ता पेन्सनबारे भएको थियो । उता पेन्सन सम्बन्धी वार्तामा गोरखाहरूका तर्फबाट ब्रिट्रिश गोरखा वेलफेयर सोसाइटीका अध्यक्ष मेजर टिकेन्द्र दल देवान र मेजर उदयबहादुर गुरुङ थिए । बेलायतले शुरूमा पेन्सनबारे कुरा गर्न इन्कार गरे पनि नेपाल र गोरखाहरूको दबाबका कारण उनीहरूका कुरा सुन्न शुरु गरेको छ ।

वार्तामा नेपाल सरकारको तर्फबाट सैनिक सहचारी कर्णेल रत्नबहादुर गोदार र द्वितीय सचिव रामबाबु नेपाल, बेलायतका तर्फबाट जेम्स ग्रीनफोर्डको नेतृत्वमा सहभागी थिए ।