बेलायतमा मुद्रास्फिति ४० वर्षकै उच्च

लण्डन । बेलायतमा मुद्रास्फिति चालिस वर्ष यताकै उच्च बनेको छ ।

अफिस फर न्याशनल स्ट्याटिटिक्सले बुधबार सार्वजनिक गरेको आँकडाअनुसार जुलाइमा बेलायतको मुद्रास्फिति दर १०.१ प्रतिशत पुगेको छ ।

यो सन् १९८२ फेब्रुअरी यताकै सबैभन्दा उच्च हो । त्यसबेला मुद्रास्फिति १०.२ प्रतिशत पुगेको थियो । तर मुद्रास्फिति तर अझै उच्च हुने आँकलन गरिएको छ । अक्टोबरसम्ममा सो दर १३.३ प्रतिशतसम्म पुग्ने विज्ञहरुले विश्लेषण गरेका छन् ।

जुन र जुलाइ महिनामा खाद्यवस्तु र पेयपदार्थमा भएको चर्को मूल्यवृद्धिले मुद्रास्फितिमा योगदान गरेको बताइएको छ । पाउरोटी, सिरियल, दुध, चीज, अण्डामा उल्लेख्य मूल्यवृद्धि भएको छ ।

युक्रेन युद्धका कारण कच्चा पदार्थको मूल्यमा भएको वृद्धि र इन्धनको मूल्यमा भएको वृद्धिका कारण मूल्य बढेको विश्लेषण गरिएको छ ।

उता मुद्रास्फितिको दाँजोमा तलवमा भने वृद्धि हुन सकेको छैन ।

बढ्दो मुद्रास्फितिलाई नियन्त्रण गर्न प्रमुख प्रतिपक्षी दल र पूर्व प्रधानमन्त्री गोर्डन ब्राउनले विभिन्न उपायहरु सुझाए पनि सत्तारुढ कंजरभेटिभ पार्टीले भने कुनै योजना ल्याएको छैन ।

सेप्टेम्बर ५ मा छानिने नयाँ नेता र प्रधानमन्त्रीको टुङ्गो लागेपछि मात्र त्यस्तो योजना ल्याइने बताइएको छ ।