ठूला पार्टीका उम्मेदवारलाई हराउँदै काठमाडौँको मेयरमा बालेन साह निर्वाचित

काठमाडौं । ठूला पार्टीका उम्मेदवारहरुलाई हराउँदै काठमाडौं महानगरपालिकाको प्रमुखमा बालेन्द्र (बालेन) साह निर्वाचित भएका छन् ।

”लौरो” चिह्न लिएर निर्वाचनमा खडा भएका स्वतन्त्र उम्मेदवार बालेन साह विहीबार राति सम्पन्न मतगणनामा ६१ हजार‍ ७६७ मतका साथ विजयी भएका छन् । काठमाडौंको मुख्य निर्वाचन अधिकृतको कार्यालयका अनुसार बालेनका प्रतिस्पर्धी सत्तारुढ गठबन्धनका तर्फबाट नेपाली कांग्रेसका सिर्जना सिंहले ३८ हजार ३४१ मत र नेकपा (एमाले) का उम्मेदवार तथा पूर्व मेयर केशव स्थापितले ३८ हजार ११७ मत प्राप्त गरे ।

उपप्रमुखमा एमालेकी सुनिता डंगोल विजयी भएकी छिन् । डंगोल ६८ हजार ६१२ मत पाइन् भने उनका निकटतम प्रतिद्वन्द्वी सत्तारुढ गठबन्धनतर्फका नेकपा (एकीकृत समाजवादी) उम्मेदवार रामेश्वर श्रेष्ठले २३ हजार ८०५ मत पाए ।

काठमाडौं महानगर प्रमुखमा नवनिर्वाचित साहको जन्म सन् १९९० मा भएको हो । विभिन्न गीत लेखन, गायन, निदेशन र र्‍याप गीतमार्फत् युवा पुस्तामा अधिक रुचाइएको साहको जीतले राष्ट्रिय राजनीतिमा नै तरंग पैदा गरेको छ ।
पुर्ख्यौली घर महोत्तरी जिल्लामा भएका साहकी आमाको नाम कुवदेवी साह र बुवाको नाम रामनारायण साह हो । साहले ह्वाइट हाउस इन्स्टिच्युट अफ टेक्नोलोजीबाट सिभिल इन्जिनियरिङमा स्नातक र भारतको कर्नाटक विश्वेश्वरैया राष्ट्रिय प्रौद्योगिक संस्थानबाट स्ट्रक्चरल इन्जिनियरिङमा स्नाकोत्तरको शिक्षा हासिल गरेका छन् ।

देशैभरका सक्षम नेता एवम् व्यक्तिसँग सहकार्य गर्दै काठमाडौं महानगरको मुहार फेर्ने प्रतिबद्धता उनले व्यक्त गरेका छन् ।

यस्तै उपप्रमुख डंगोलको कला, संस्कृति संरक्षण एवम् सम्बर्द्धनमा उहाँको छुट्टै पहिचान छ ।

वैशाख ३० गते सम्पन्न स्थानीय निर्वाचनको केही समयअघि मात्रै उनी एमाले प्रवेश गरेर उपप्रमुखको उम्मेदवार बनेकी हुन् ।

सन् २०११ को मिस नेवा नामक सौन्दर्य प्रतियोगितामा उनी विजयी भएकी थिइन् । यसैगरी, नेपाल भाषाको रञ्जना लिपी प्रवर्द्धनमा पनि उनको योगदान रहेको छ । काठमाडौं महानगरको सम्पदा संरक्षण, पर्यावरणीय र पूर्वाधार विकासमा उनले प्रतिबद्धता व्यक्त गर्दै आएकी छिन् ।