पूर्व गोरखा सैनिक गुरुङले पाए लण्डनको बार्नेट काउन्सिलमा काउन्सिलरको टिकट

लण्डन । पूर्व गोरखा सैनिक कमल गुरुङले लण्डन बोरो अफ बार्नेटमा काउन्सिलरको टिकट पाएका छन् ।

यही मे महिनामा हुने बेलायतको स्थानीय चुनावमा उनले स्थानीय ब्रन्टोक वडामा लेबोर पार्टीका तर्फबाट सो टिकट पाएका हुन् ।

उनी करिब डेढ दशकदेखि लेबोर पार्टीमा आवद्ध छन् ।

उनले टिकट पाएको वडा लेबोर पार्टीको सुरक्षित वडा मानिन्छ ।

तमु समाज युकेमार्फत बेलायतको नेपाली समुदायिक सेवामा पनि सक्रिय गुरुङले आर्मीबाट अवकास पाएपछि अध्ययनलाई अगाडी बढाएका छन् । उनले बर्वेक कलेज, युनिभर्सिटी अफ लण्डनबाट राजनीति शास्त्रमा स्नातकोत्तर पनि गरेका छन् ।

तमु समाज युकेले उनलाई निर्वाचनमा सफलताका लागि शुभकामना व्यक्त गरेको छ ।

गुरुङले भने अहिले पार्टीभित्र मिडियामा कसरी प्रस्तुत हुने बारेमा छलफल भइरहेकाले त्यसपछि मात्र विस्तृतमा जानकारी दिने बताए ।

बेलायतको स्थानीय राजनीतिमा नेपाली मूलका मानिसहरुको स‌ंलग्नता क्रमश बढ्दै छ ।

गुरुङले टिकट पाएको बार्नेट काउन्सिलमा उपमेयर समेत नेपाली मूलका लक्ष्यबहादुर गुरुङ छन् ।