नेपाल जाँदा अनिवार्य होटल क्वारेन्टाइनमा बस्न पर्ने निर्णय स्थगित

लण्डन । नेपाल सरकारले ६७ मुलुकबाट नेपाल जाँदा अनिवार्य होटल क्वारेन्टाइनमा बस्नुपर्ने निर्णय स्थगित गरेको छ ।

कोरोना भाइरसको ओमिक्रोन भेरियन्ट फैलिन नदिन सरकारले शुक्रबार बेलायत लगायतका मुलुकबाट नेपाल जाने यात्रुहरुलाई सात दिन होटल क्वारेन्टाइनमा बस्न पर्ने प्रावधान घोषणा गरेकोमा शनिबार सो निर्णय ‘अर्को निर्णय नभएसम्मका लागि’ स्थगित भएको बताएको छ ।

अध्यागमन विभागले शनिबार एक सूचना जारी गरी सो जानकारी दिएको हो ।

स्वास्थ्य मन्त्रालयबाट आएको पत्रका आधारमा शुक्रबार नै उक्त व्यवस्था लागू गरिएको तर कोभिड–१९ सङ्कट व्यवस्थापन समन्वय केन्द्र (सीसीएमसी) का अधिकारी तथा गृह मन्त्रालयबाट समेत तत्कालका लागि उक्त व्यवस्थालाई पुनःविचार गर्नुपर्ने देखिएको र थप छलफल गर्नुपर्ने कुरा आएकाले तत्कालका लागि उक्त व्यवस्था स्थगन गरिएको विभागका महानिर्देशक नारायणप्रसाद भट्टराइले जानकारी दिनुभयो । उक्त विषयमा सोमबार सीसीएमसीका प्रतिनिधि, विभिन्न मन्त्रालयका अधिकारीसहितको बैठक बस्ने भएकाले सोही बैठकको निर्णयका आधारमा अघि बढ्ने गरी हाललाई उक्त व्यवस्था स्थगन गरिएको विभागले जनाएको छ ।

विभागले यसअघि जारी अफ्रिकी मुलुकहरुबाट नेपाल आउँदा अपनाउनु पर्ने नियम भने अझै कायम गरेको बताएको छ ।