बेलायतमा कोरोना भाइरसविरुद्ध अतिरिक्त खोप दिन शुरु

लण्डन । जाडो याममा कोरोनाभाइरसबाट बच्नका लागि बेलायतमा कोरोना भाइरसविरुद्ध अतिरिक्त खोप दिन शुरु गरिएको छ ।

बेलायत सरकारका खोप सल्लाहकारहरुले अतिरिक्त खोप लगाउन गत साता सल्लाह दिएसँगै विहीबारबाट सो खोपको अतिरिक्त मात्रा दिन शुरु गरिएको हाे । लण्डनको क्रोयडन युनिभर्सिटी अस्पतालमा कार्यरत क्याथरिन कारगिल सो खोप लगाउने पहिलो व्यक्ति बनेकी छिन् ।

प्रसुति सहायक कारगिल सो खोपले आफूलाई काम गर्न, पढ्न र परिवारसित समय बिताउन मद्दत गर्ने अपेक्षा गरेकी छिन् । ”जाडो याम आउन लाग्दा मैले यो खोप लगाएर सुरक्षित महसुस गरेको छु र अरुलाई पनि अतिरिक्त खोप दिन बोलाइएको बखत लगाउन हुन अनुरोध गर्दछु” उनले भनिन् ।

सरकारले इङल्याण्ड र वेल्समा विहीबारदेखि अतिरिक्त खोप दिन शुरु गरेको छ ।

करिब ३ करोड मानिसहरुलाई सो अतिरिक्त डोज दिने सरकारको योजना छ । यसरी अतिरिक्त डोज पाउनेहरुमा स्वास्थ्य सेवाका कर्मचारीहरु, ५० वर्ष नाघेका मानिसहरु र कोभिडबाट जोखिममा रहेका ५० वर्षमुनीका मानिसहरु रहेका छन् ।

यसरी दिइने अतिरिक्त डोज खोपमा धेरैजसो फाइजर एण्ड बायोनटेकको खोप रहेको छ र केही खोप मोडर्नाको हुने बताइएको छ ।

स्कटल्याण्डमा भने सोमबारदेखि अतिरिक्त खोप दिइने प्रथम मन्त्री निकोला स्टरजेनले बताएको छिन् । उता उत्तरी आयरल्याण्डमा भने यो महिनाको अन्त्यबाट खोप दिन शुरु गरिने अपेक्षा गरिएको छ ।

बेलायतका स्वास्थ्य मन्त्री साजिद जावेदले सरकारको जाडो याममा कोभिड १९ नियन्त्रण गर्ने योजना अनुसार अतिरिक्त खोप दिन लागिएको बताएका छन् ।

कोभिड १९ विरुद्ध दिइएको खोपले विकास गरेको रोग प्रतिरोध क्षमता समय बित्दै जाँदा घट्दै जाने भएकाले अतिरिक्त डोज दिन परेको बताइएको छ । अहिले इङल्याण्ड र वेल्सका अस्पतालहरुले कर्मचारी र बिरामीहरुलाई सो खोप दिन शुरु गरेका छन् भने अब बिस्तारै जीपीहरुले पनि अतिरिक्त डोज दिन शुरु गर्ने बताइएको छ ।

अर्को सातादेखि फार्मेसीहरु र खोप केन्द्रहरुमा पनि अतिरिक्त डोज खोप दिन शुरु गरिने योजना छ ।