इङल्याण्डमा स्वास्थ्य र हेरचाहका लागि नयाँ कर लागू गरिने

लण्डन । इङल्याण्डमा स्वास्थ्य र हेरचाहका लागि नयाँ कर लगाइने भएको छ।

प्रधानमन्त्री बोरिस जोन्सनले आउने आर्थिक वर्षदेखि सो कर लागू गरिने बताएका छन् ।

हेल्थ एण्ड सोसल केयर लेभी नाम दिइएको नयाँ कर सन् २०२२ को अप्रिल महिनादेखि लागू हुनेछ । शुरुको वर्ष सो करवापत हरेक कामदारले तिर्ने राष्ट्रिय बीमा (न्याशनल इन्स्योरेन्स)मा १ दशमलव २५ प्रतिशत थप गरी काटिने छ भने सन् २०२३ को अप्रिलदेखि भने नयाँ करका रुपमा  तलवबाट अलग्गै कट्टा गरिनेछ ।

अहिले न्याशनल इन्स्योरेन्स दर २ प्रतिशत मात्र रहेको छ । सन् २०२२ को अप्रिलदेखि २०२३ को मार्चसम्म न्याशनल इन्स्योरेन्स दर ३.२५ प्रतिशत कायम हुनेछ र त्यसपछि पुन २ प्रतिशतमा झर्नेछ ।

स्वास्थ्य तथा सामाजिक हेरचाहमा लाग्ने खर्च व्यवस्थापन गर्न सो कर ल्याउनु परेको सरकारको भनाइ छ ।

सरकारले राष्ट्रिय स्वास्थ्य सेवामा खर्च व्यवस्थापन गर्न नसक्दा धेरैले समयमा उपचार नपाएको आरोप लाग्दै आएको छ भने वृद्ध, अशक्त, अपाङ्गता भएकाहरुलाई आवश्यक सेवा दिन नसकेकोमा पनि सरकारको आलोचना हुने गरेको छ ।

प्रस्तावित करका बारेमा आजै संसदमा छलफल भई मतदान हुने योजना छ ।

इन्स्टिच्यूट अफ फिस्कल स्टडिजले यसलाई ४० वर्षयताकै करमा सर्वाधिक वृद्धि बताएको छ ।

वर्षको ९ हजार ५६४ पाउण्डभन्दा कम आर्जन गर्नेहरुले भने नयाँ कर तिर्नपर्ने छैन ।

सरकारले नयाँ करबाट वार्षिक १२ विलियन पाउण्ड प्राप्त हुने अपेक्षा गरेको छ ।