यसरी साकार भयो दक्षिण पूर्वी लण्डनमा नेपाली गुम्बा स्थापनाको सपना

लण्डन । डायमन्ड बुद्धिस्ट सेन्टर यूके आफ्नो प्रारम्भिक कालमा कसैको मद्दतको लागि लालायीत थियो । तर सोँचेजस्तो हुनसकिरहेको थिएन । त्यसपछि भगवान बुद्धको अमृतवाणीलाई अनुसरण गरी आफ्नै क्षमतामा कामगर्नु अरुमाथि निर्भर नरहनु भन्ने कुरालाई आत्मसात गरेर अघि बढ्दै आएको थियो । यो थियो सन् २०१८ सालको कुरा । जतिबेला डायमन्ड बुद्धिस्ट सेन्टर यूकेले पहिलो च्यारिटी कार्यक्रम गरेको थियो । धेरै बाधा, अड्चनहरुको बावजूद अन्तगत्वा अहिले सफलता प्राप्त भएको छ ।

जसरी तीनवटा कुराहरु चन्द्रमा, सूर्य र सत्य धेरैबेर लुकाउन सकिदैन त्यस्तै यथार्थमा हाम्रो सपना पनि लुक्न सकेन । यो सत्यमा परिणत भयो । डायमन्ड बुद्धिस्ट सेन्टर यूकेको गुम्बा निर्माण अभियानमा डायमन्ड बुद्धिस्ट सेन्टर यूकेका अध्यक्ष सुमलकुमार गुरुङले यस संस्थालाई शुरुमा कम्पनी हाउसमा गैरमुनाफामूलक धार्मिक संस्थाको रुपमा दर्ता गरेका थिए । त्यसपछि च्यारिटी कमिसनमा दर्ता गरे । उनले निरन्तर ट्रस्टी र आजीवन सदस्य बनाउने काममा आफ्नो टिमको सहयोगबाट दिनरात खट्दै गए । कैयौंपटक लिलामी (अक्सन) बिक्रीका प्रोपर्टीहरुलाई आफ्नै पैसा डिपोजिट राखेर लिलाम बिक्रीमा किन्ने अथक मिहिनेत गरे । धेरै प्रयासपछि गत २८ जुलाई २०२१ को दिनमा अध्यक्ष सुमलकुमार गुरुङले बेलायतको राजधानी लण्डनको दक्षिणपूर्वी शहर वुलविचमा एउटा लिलामीमा राखिएको गिर्जाघर किन्न सफल भए । यसभन्दा अघि यस प्रयोजनका लागि उनले तीनवटा उपसमिति गठन गरेका थिए ।

त्यस अक्सन जितको ऐतिहासिक क्षणले चमत्कार नै गर्‍यो । आर्थिक सङ्कलन समितिका संयोजक संस्थाकी उपाध्यक्ष तथा आमा समूह प्रमुख मीना गुरुङ, उपसंयोजक चन्द्रदेवी गुरुङलगायत ईकाईका प्रतिनिधिहरु, सम्पूर्ण संस्थाका पदाधिकारीहरुको उर्जाले शौर्य प्रदर्शन गर्न थाल्यो । चारैतिरबाट गुम्बा निर्माण सहयोगका लागि अनुदानहरुको बाढी नै लाग्यो । १७ दिनभित्र संस्थालाई चाहिने आर्थिक सङ्कलन अभियान सफल बन्यो । यसै दौरान अध्यक्षले बेलायतको कानूनबमोजिम कागजी कार्वाई तथा आर्थिक सङ्कलन श्रोत खुलाउन दिनरात प्रमाणित दस्तावेजहरु जुटाउँदै आए । यस कार्यमा महासचिव योगेश गुरुङ र कोषाध्यक्ष सुर्जा गुरुङले अध्यक्षलाई ठूलो मद्दत पुर्‍याएका थिए । संस्थापक अध्यक्ष सुमलकुमार गुरुङको नेतृत्वमा पहिलोपटक बेलायतको राजधानी लण्डनमा पहिलो नेपाली गुम्बा निर्माण गर्न सफल भएको छ ।

अध्यक्ष सुमलकुमार गुरुङको यस अभियानलाई डायमन्ड बुद्धिस्ट सेन्टर यूकेका सम्पूर्ण ट्रस्टी र आजीवन सदस्यहरु, बेलायतका धार्मिक संस्थाहरु, धेरै संघसंस्थाहरुले आर्थिक सहयोग गरेका छन् । नेपालीहरुको ऐक्यवद्धताको नमुना र साथ सहयोग अविस्मरणीय रहेको छ । विदेशमा आएर यसरी आफैँ सङ्घर्ष गरेर जिउन बाध्य भएका नेपालीहरु आफ्नो मौलिक पहिचान कायम राख्दै एकजुट भएर आफ्नो धर्मसंस्कारको लागि जुटेको नमुना अहिले डायमन्ड बुद्धिस्ट सेन्टर यूके पर्याय बनेको छ ।

गुम्बाको सम्पूर्ण कागजातहरु पूरा भएपछि हिजो, २६ अगस्त २०२१को दिनमा प्रोपर्टीको सबै पैसा तिरेर समाजका कोषाध्यक्ष सुर्जा गुरुङले चाबी लिएका थिए । यस धार्मिक संस्थाका मूलगुरु खेनरिम्पोचे शिरलामा (थुप्तेन युशे)ज्यूको मार्ग निर्देशनमा आज पन्चमीको शुभ मुहुर्तमा गुरुको अष्टमंगल प्रार्थना वाचनबाट गुम्बाको मूलद्वार खोलेर संस्थाका पदाधिकारीहरु, सदस्यहरु र अन्य सबै श्रद्धालुहरुले प्रवेश गरेका थिए ।

अध्यक्षले चाबी खोलेर प्रवेश गर्दा पन्चकन्याबाट पुष्पजल सहितको अङ्खोरा अघि अघि पार्दै मूलगुरुको अष्टमङ्गल वाचनमा प्रवेश गरेको थियो । हलभित्र यस ऐतिहासिक कार्यक्रमलाई बत्ती प्रज्वलन, धूप बालेर चारैदिशा धजाहरु झुण्ड्याएर सम्पन्न गरेको थियो । यस कार्यक्रमलाई महासचिवले सन्चालन गरेका थिए भने आमा समूह प्रमुख उपाध्यक्ष मीना गुरुङले स्वागत मन्तव्य व्यक्त गरेकी थिइन् । अध्यक्षको सम्बोधन पछि उपस्थित संघसंस्थाका नेतृत्व वर्गको शुभकामना सन्देश राखिएको थियो । पन्चकन्यालाई दक्षिणा दिएर कार्यक्रमको रौनकतालाई थप दिव्यता दिएको थियो । अन्तमा उपस्थित सबैलाई मिठाई जलपान खुवाएर अध्यक्षले सबैलाई धन्यवाद दिँदै कार्यक्रम समापन गरेका थिए ।