गोरखाहरुको अनसन तोडियो, डिसेम्बरमा वार्ता हुने

लण्डन । गोरखा भूतपूर्व सैनिकहरुको समस्या समाधानका लागि दुई देशबीच वार्ताको मिति तय हुनुपर्ने माग गर्दै १३ दिनदेखि लण्डनमा आमरण अनसनरत गोरखाहरुको अनसन तोडिएको छ ।

बेलायतका भेट्रान मिनिस्टरले बेलायती राजदुतलाई गोरखा भूतपूर्व सैनिकहरुको समस्याका बारेमा डिसेम्बर महिनाभित्र वार्ता शुरु गर्ने पत्र पठाएपछि सो अनसन तोडिएको हो ।

गोरखाहरु अनसनरत स्थानमा बेलायतका भेट्रान मिनिस्टर लियो डोकोर्टी तथा बेलायतका लागि नेपाली राजदुत लोकदर्शन रेग्मी, उपनियोग प्रमुख श्रीमती रोशन खनाल पुगी अनसन बसिरहेका ज्ञानराज राई, पुष्पा राना घले र धनबहादुर गुरुङलाई जुस खुवाई अनसन तोडिएको थियो ।

नेपाली दुताबास लण्डनका उपनियोग प्रमुख श्रीमती रोशन खनालका अनुसार गोरखाहरुको समस्या समाधानका लागि प्राविधिक समितिले सन् २०१८ मा बुझाएको प्रतिवेदनका आधारमा दुई देशका सरकारी पक्ष र गोरखाहरुबीच वार्ता हुने छ । सो वार्ताको तयारीका लागि सेप्टेम्बर ८ मा नेपाली दुताबास लण्डनमा बैठक हुनेछ ।

गोरखा सत्याग्रह संयुक्त संघर्ष समितिका प्रमुख संयोजक कृष्णबहादुर राईले आफूहरुको माग पूरा भएका कारण अनसन तोडेको बताए । उनले गोरखाहरुको माग पूरा गराउनका लागि प्रयास गरिदिएकोमा नेपाली दुताबास लण्डन, मिडियाकर्मीहरु, गोरखाहरु र सबैलाई धन्यवाद दिए ।

अनसनमा बसेकी पुष्पा राणा घलेले विजय मनाउने समय अझै आइनसकेको बताए । उनले आफूहरुको अनसन तोडिएको र अब वार्ताको ढोका खुलेको बताए ।

अनसनमा बसेका अर्का गोरखा ज्ञानराज राईले यो सबै नेपालीहरुको जित भएको हो ।