बेलायतले २० हजार अफगान नागरिकलाई बसोबास गर्न दिने

लण्डन । तालिवानले अफगानिस्तानलाई पूर्ण रुपमा नियन्त्रण लिएपछि ज्यानको जोखिम ठानेर देश छोडेका करिब २० हजार मानिसलाई बेलायतले बसोबासको अनुमति दिने भएको छ ।

बेलायतको गृह मन्त्रालयका अनुसार तालिवानका कारण असुरक्षा महसुस गरी देश छाडेका करिब ५ हजार जनालाई पहिलो वर्ष बेलायतमा स्थायी बसोबासको सुविधा दिइने छ । जसमा महिला, बालबालिका, तालिवानबाट मानवअधिकार हननको जोखिममा रहेका धार्मिक र अन्य अल्पसंख्यकहरुलाई प्राथमिकता दिइने छ ।

सरकारले स्थानीय काउन्सिलहरु लगायत अन्य निकायहरुसँग समन्वय गरी अफगान शरणार्थीहरुलाई बेलायतमा नयाँ घर बसाउन आवश्यक सहयोग गर्ने बताएको छ ।

बेलायतले यसअघि सिरिया संकटका कारण विस्थापित २० हजार शरणार्थीलााई बसोबास दिएको थियो ।

बेलायत सरकारको नयाँ योजना यसअघि नै घोषणा गरिएको अफगान रिलोकेसन एण्ड एसिस्टेन्स पोलिसी भन्दा फरक रहेको बताइएको छ । सो पोलिसीअन्तर्गत विगतमा बेलायतसित काम गरेका करिब ५ हजार स्थानीय अफगानहरुलाई बेलायतमा बसोबासको योजना बनाइएको थियो ।

अफगानिस्तानमा गत साता तालिवानले नियन्त्रण जमाएपछि असुरक्षा महसुस गरेर देश छाडेकाहरुलाई विश्वका विभिन्न देशले बसोबासको सुविधा दिने घोषणा गरेका छन् ।