तमुधिँ युकेद्वारा राजदुत रेग्मीलाई आफ्नै भवनमा स्वागत

लण्डन । तमुधिँ युकेले बेलायतका लागि नेपाली राजदुत लोकदर्शन रेग्मीलाई आफ्नै भवनमा स्वागत गरेको छ ।

तमुधिँ एसोसिएसनको भवन मिचेटमा शनिबार आयोजित एक कार्यक्रममा तमुधिँ युकेका अध्यक्ष हितकाजी गुरुङले गुरुङ पोशाक भाङ्ग्रा र फेटा लगाई सम्मान गर्नुभएको थियो । ब्यागपाइपरको धुनसँगै अध्यक्ष गुरुङले दुताबासका उपनियोग प्रमुख श्रीमती रोशन खनाल तथा अन्य कर्मचारीहरुलाई पनि पुष्पगुच्छाले स्वागत गर्नुभएको थियो ।

सो अवसरमा अध्यक्ष गुरुङले तमु धिँ र राजदुतवासको सहकार्यमा बेलायतमा नेपाली संस्कृतिको जगेर्ना गर्ने, व्यापार प्रवर्धनमा जोड दिने, नेपालमा महिलाहरुको विकासमा जोड दिने, दुर्गमा क्षेत्रमा रहेको विद्यालयमा सहयोग गर्ने योजना रहेको बताए ।

उपाध्यक्ष हरि गुरुङले स्वागत भाषण गर्नुभएको सो कार्यक्रमको संचालन महासचिव पर्शु गुरुङले गर्नुभएको थियो । सो अवसरमा गोर्खा कप सफल पार्न सहयोग गरेकोमा तमुधिँ लण्डन इकाई र अध्यक्ष विष्णु गुरुङ, उपाध्यक्ष भरत गुरुङ, पूर्व अध्यक्ष चन्द्रबहादुर गुरुङ, सल्लाहकार ललितमान गुरुङलाई फेटा तथा खादा लगाई सम्मान गरिएको थियो भने आमा समूहलाई बधाई तथा सम्मान गरिएको थियो ।

गोर्खा कप सफल पार्न सहयोग गर्नु भएकोमा संयोजक क्याप्टेन देव घले, मुख्य द्वारमा सहयोग गर्नु हुने तमुधिँ दक्षिण पूर्व लण्डन इकाई र अध्यक्ष ह्यारी गुरुङलाई खादा र फेटाद्वारा सम्मान गरिएको थियो ।

कार्यक्रममा सल्लाहकारहरुले गोरखा कपका बारेमा विभिन्न सल्लाह सुझाव दिएका थिए । त्यसपछि नेपाली मेलाका संयोजक उपाध्यक्ष हरि गुरुङबाट नेपाली मेलाको तयारीका बारेमा विस्तृत जानकारी दिइएको थियो ।

अध्यक्ष हितकाजी गुरुङले गोर्खा कप सफल पारिदिनु भएकोमा सम्पूर्णलाई धन्यवाद साथै आउँदै गरेको नेपाली मेलामा सबैलाई निमन्त्रणा गर्नुभएको थियो । गोर्खा कपमा नेपाली नाच प्रस्तुत गर्ने सयपत्री कल्चर सेन्टरलाई राजदुत रेग्मीबाट प्रमाणपत्र प्रदान गरिएको थियो ।