बेलायती सांसदहरुद्वारा प्रधानमन्त्री जोनसनलाई आमरण अनसन बसेका गोरखाहरुलाई भेट्न सुझाव

लण्डन । बेलायती सांसदहरुले बेलायती प्रधानमन्त्री बोरिस जोनसनलाई पत्र लेख्दै आमरण अनसनमा बसेका गोरखा भूतपूर्व सैनिकहरुलाई भेट्न आग्रह गरेका छन् ।

बेलायती संसदमा गठित सर्वदलीय समितिमा रहेका सांसदहरु बीरेन्द्र शर्मा, लर्ड बिलिमोरिया, सीमा मल्होत्रा, नभेन्दु मल्लिक, आलान डोरान्स, डान जार्भिस, लर्ड शेख र निक स्मिथले आज प्रधानमन्त्री जोन्सनलाई पत्र लेख्दै सो आग्रह गरेका हुन् ।

पत्रमा उनीहरुले प्रधानमन्त्री जोनसनलाई अनसनकारी गोरखाहरुको गुनासो सुन्न र छलफल गर्न सुझाव दिएका हुन् । गोरखाहरुसितको वार्ताले आमरण अनसनमा बसेका गोरखाहरुको ज्यान बचाउन सक्ने र गोरखाहरुको समस्याप्रति सरकार गम्भीर छ भन्ने सन्देश जाने उनीहरुले बताएका छन् ।

सर्वदलीय संसदीय समितिले पहिलेदेखि नै गोरखा समस्याको निस्पक्ष समाधान हुनुपर्छ भन्दै आएको बताउँदै उनीहरुले पत्रमा गोरखाहरुले सम्मान महसुस गर्ने र उनीहरुको सेवाको कदर हुने किसिमको समाधान चाहिएको बताएका छन् ।

आजै संसदीय समितिका अध्यक्ष बीरेन्द्र शर्मा गोरखाहरु अनसन बसेको स्थलमा पुगी उनीहरुको अवस्था र मागका बारेमा जानकारी लिएका थिए ।

विगत सात दिनदेखि गोरखा समस्या समाधानका लागि नेपाल र बेलायत सरकारबीच उच्च स्तरीय वार्ता टोली गठन भई वार्ताको मिति तोकिनुपर्ने माग राखी ज्ञानराज राई, धनबहादुर गुरुङ र पुष्पा राना घले आमरण अनसनमा बसेका छन् ।