बेलायतमा दुवै डोज खोप लगाएकाले सोमबारदेखि सेल्फ आइसोलेसनमा बस्न नपर्ने

लण्डन । कोभिड १९ बाट संक्रमितहरुको संक्रमणमा आएका व्यक्तिहरुले दुवै डोज कोरोना खोप लगाएको अवस्थामा सेल्फ आइसोलेसनमा बस्न नपर्ने भएको छ ।

बेलायत सरकारले विहीबार पूर्व जारी निर्देशिकामा संशोधन गर्दै कोभिड १९ को दुवै डोज लगाएका व्यक्तिहरुले घरमा कोही कोभिड १९ बाट संक्रमित भएमा सेल्फ आइसोलेसनमा बस्न नपर्ने बनाएको हो । तर दुवै डोज खोप लगाएको कम्तीमा १४ दिन पुगेको हुनुपर्नेछ ।

यसैगरी १८ वर्ष ६ महिनाभन्दा कम उमेरका व्यक्तिहरुले पनि परिवारमा कोही कोरोना संक्रमित भएमा सेल्फ आइसोलेसनमा बस्न नपर्ने भएको छ । यस्तै, कोभिड १९ को खोपको परीक्षणमा हाल सहभागीहरु र स्वास्थ्यका कारण कोरोना खोप नलगाएकाहरुले पनि सेल्फ आइसोलेसनमा बस्न पर्ने छैन ।

यसअघि कोभिड १९ संक्रमित व्यक्तिहरुको सम्पर्कमा आएकाहरुलाई एनएचएसको कन्ट्याक्ट ट्रयासिङ आप्सले सेल्फ आइसोलेसन बस्न अह्राएपछि बेलायतका विभिन्न व्यवसायहरु प्रभावित भएको गुनासो सुनिँदै आएको थियो । १८ वर्षमुनीकाहरुलाई पनि सेल्फ आइसोलेसनमा बस्न सुझाव दिइएका कारण उनीहरुको पठनपाठन पनि प्रभावित हुँदै आएको थियो ।

यसअघि सरकारले सुपरस्टोर लगायतका विभिन्न व्यवसायमा कार्यरत कर्मचारीहरुले सेल्फआइसोलेसनमा बस्न नपर्ने गरी नियम परिवर्तन गरेको थियो ।