बेलायतको अर्थतन्त्र चौथो महिना निरन्तर उकालो लाग्दै

लण्डन । बेलायतको अर्थतन्त्र निरन्तर चौथो महिना वृद्धि भएको छ ।

बेलायतको अफिस फर न्याशनल स्ट्याटिटिक्सका अनुसार मे महिनामा बेलायतको अर्थतन्त्र शुन्य दशमलब ८ प्रतिशतले वृद्धि भएको पाइएको छ । सरकारले पव तथा रेस्टुरेन्टहरु खोल्न र परिसरमा सेवा गर्न दिएकाले सो महिनामा अर्थतन्त्र सुधार भएको अफिसको विश्लेषण छ ।

तथापि मे महिनाको वृद्धि अप्रिल महिनाको तुलनामा झीनो मात्र छ । अप्रिल महिनामा बेलायतको अर्थतन्त्र २ प्रतिशतले बढेको थियो ।

अफिसका अनुसार बेलायतको अर्थतन्त्र पूर्व महामारीको तहभन्दा अझै ३ प्रतिशतले तल छ ।

अर्थशास्त्रीहरुले भने वृद्धितर ढिलो हुनु अनपेक्षित रहेको बताएका छन् । क्यापिटल इकोनोमिक्सका अर्थशास्त्री पल डेल्सले यति छिटै अर्थतन्त्र तङग्रिने दर ढिला होला भन्ने सोचेको थिएन भनेका छन् ।

ओएनएसका अर्थशास्त्री जोनाथन आथोले पव रेस्टुरेन्ट र होटलहरु मे महिनाको वृद्धिको कारक रहेको बताएका छन् ।