उपाध्यक्ष डा. केसीद्वारा एनआरएनए युकेले कोरोना र जनगणनामा खेलेको भुमिकाको प्रसंसा

लण्डन । गैरआबासीय नेपाली संघ (एनआरएनए) युके आइसीसी उपाध्यक्ष डा. बद्री केसीले कोरोना संक्रमण र जनगणनामा एनआरएनए युकेले खेलेको भुमिकाको प्रसंसा गरेका छन । एनआरएनए युके इंग्ल्याण्ड राज्य समन्वय परिषद्ले आइतबार भर्चुअल रुपमा आयोजना गरेको जनगणना अभियान समापनमा बोल्दै डा. केसीले एनआरएनए युकेको कार्यको उच्च प्रसंसा गरेका हुन ।
‘कोरोना संक्रमणको महामारीमा समुदायमा गएर राहत बितरण गर्ने र जनगणनामा बेलायतस्थित नेपाली समुदायलाई अधिक सहभागी गराउन साहसिक काम गरेको छ’, उनले जुम मार्फत भएको अन्तरक्रियामा भने । गत २१ मार्चमा बेलायतमा राष्ट्रिय जनगणना गरिएको थियो । जसमा राज्य समन्वय परिषद्ले यहाँस्थित नेपाली समुदायले आफ्नो पहिचान स्वरुप नेपाली लेख्न संघसंस्था र सामाजिक अगुवाहरु संग मिलेर अभियान चलाएका थिए ।
उपाध्यक्ष डा केसीले गैरआवासीयलाई नेपाली नागरिकतामा अधिकार दिलाउने प्रयास जारी रहेको बताए । उनले डायस्पोराका नेपालीले नेपाली नागरिकताको अधिकार पाउने भएकाले ढुक्क हुन आग्रह गरे । समापन कार्यक्रममा परिषद्का सचिव गोविन्द खरेलले दुई महिनाका बिचमा परिषद्ले चरणबद्ध रुपमा गरेका कार्यक्रमको विस्तृत बिवरण पेश गरेका थिए । जनगणना सचेतता अभियानका संह संयोजक गजेन कटवालले बेलायतस्थित सामाजिक, जातीय र अन्य संघसंस्था समन्वय गरि जनगणनामा गरिएको कामका बारेमा जानकारी दिए । जनगणना सचेतना कार्यक्रमका मिडिया संयोजक तथा नेपाल पत्रकार महासंघ युके वरिष्ठ उपाध्यक्ष श्याम लुईटेलले जनगणनामा बेलायतस्थित नेपाली मिडियाले खेलेको भुमिका जानकारी गराएका थिए । उनले सामाजिक कार्यमा महासंघ युके संघसंस्थाहरु सँग हातेमालो गर्दै हिडन तयार रहेको बताए ।

इंग्ल्याण्ड राज्य समन्वय परिषद् तथा जनगणना सचेतता अभियानका संयोजक दिपक श्रेष्ठले भर्चुअल कार्यक्रममा उपस्थित सबैलाई धन्यवाद दिदै सहकार्य गर्ने संघसंस्था र सामाजका अगुवाहरुको सहयोग जारी रहने अपेक्षा गरे । एनआरएनए युके अध्यक्ष पुनम गुरुङको अध्यक्षतामा जनगणना समापन कार्यक्रम चलिरहेको छ ।