स्कटिस बलरले चढेको होइन रहेछ सगरमाथा

काठमाडौं। जारी विश्वकप क्रिकेटमा स्कटल्यान्डका अल राउन्डर इयान वार्डल स्कटल्यान्डको ओपनिङ बलर मात्रै नभएर विश्वकै सर्वोच्च शिखर सगरमाथा आरोहीको रुपमा चिनिने गर्दथे । उनले सन् २०१२ मा सगरमाथा आरोहण गरेको दाबी गर्दै अाएका थिए।

अहिले पनि गुगलमा खोज्ने हो भने उनले सगरमाथा चढेको बारेमा २९ सेकेन्डमा ६ हजार २ सय पेज देखिन्छ । त्यतिमात्रै होइन, इन्टरनेसनल क्रिकेट काउन्सिल (आइसिसी), इङल्यान्ड र वेल्सको क्रिकेट बोर्ड र क्रिकेट अस्ट्रेलियाले पनि सगरमाथा चढेको बताएको छ। तर, सत्य होइन रहेछ । वार्डलले बिबिसीसँग कुरा गर्दै सत्य नभएको बताएका छन्।

‘केही होइन’ उनले बिबिसीसँग भने, ‘केही वर्षअघि जोकै जोकमा सगरमाथा आरोहणको कुरा गरेको थिएँ। त्यसलाई नै सत्य मानेर वेबसाइटमा हालिदिए । यो यस्तो गरि फैलियो कि नियन्त्रण नै गर्न सकिएन ।’ त्यसपछि कुरा नियन्त्रण बाहिर गयो।’

उनी सन् २०१३ देखि स्कटल्यान्ड टिममा छन्। उनी स्कटल्यान्डको तर्फबाट ओपनिङ बलरको रुपमा खेल्छन्।