लण्डनमा कोरोना ‘नियन्त्रण बाहिर’

लण्डन । लण्डनमा कोरोना भाइरसको संक्रमण द्रुत गतिमा फैलिएपछि स्वास्थ्य सेवालाई बचाउन लण्डनका मेयर सादिक खानले ‘ठूलो घटना’ घोषणा गरेका छन् ।

मेयर खानले राष्ट्रिय स्वास्थ्य सेवा (एनएचएस) लण्डनका अधिकारीहरु, स्थानीय काउन्सिलका नेताहरु, जनस्वास्थ्य इङल्याण्डका अधिकारीहरु र आकस्मिक सेवाका अधिकारीहरुसितको परामर्शपछि सो घोषणा गरेको बताएका छन् ।

लण्डनमा प्रति १ लाख मानिसमा १ हजार मानिस कोरोना संक्रमित छन् भने ३० डिसेम्बर देखि ६ जनवरीसम्ममा कोभिडका कारण अस्पताल भर्ना हुनेहरुको संख्या २७ प्रतिशतले बढेको छ । यसैगरी भेण्टिलेटरमा भर्ना हुने बिरामीहरुको संख्या ४२ प्रतिशतले बढेको छ । करिब १ हजार मानिस एक सातामा भेन्टीलेटरमा थपिएका छन् भने दिनहुँ ८३० जना लण्डनमा अस्पताल भर्ना हुने गरेका छन् ।

लण्डनको सबैभन्दा ठूलो अस्पताल रोयल लण्डन अस्पतालमा अति सघनकक्ष (आइसियु)मा अब ३० बेड मात्र खाली रहेको बताइएको छ । कुल १५० आइसियु बेड रहेको सो अस्पतालमा अब बाँकी रहेको बेड भरिएपछि गम्भीर अवस्थाका बिरामीहरुमध्ये पनि छान्नुपर्ने अवस्था आउने छ ।

‘ठूलो घटना’ सामान्य अवस्थाभन्दा बाहिर जानुपरेको स्थितिमा र मानिसको जीवन, अत्यावश्यक सेवा, वातावरण र राष्ट्रिय सुरक्षामा गम्भीर असर, क्षति, अवरोध, खतरा हुने अधिक सम्भावना हुँदा घोषणा गर्ने गरिन्छ ।

लण्डनमा यसअघि सन् २०१७ मा ग्रेनफेल टावरमा आगलागी हुँदा, सन् २०१६ वेष्टमिन्स्टर पुलमा आतङ्ककारी आक्रमण हुँदा र क्रोयडनमा ट्राम दुर्घटना हुँदा ‘ठूलो घटना’ घोषणा गरिएको थियो ।