लण्डन । बेलायतले पनि आज (सोमबार)देखि अक्सफोर्ड विश्वविद्यालय र अस्ट्राजेनिका फर्मास्यूटिकल्स कम्पनीले तयार पारेको खोप दिन शुरु गरेको छ ।
बेलायतको अक्सफोर्डसायरस्थित चर्चिल अस्पतालमा एक ८२ वर्षीय पुरुषलाई सबैभन्दा शुरुमा सो खोप दिइएको हो ।
ब्रायन पिकर नाम गरेका उनी मिर्गौलाका बिरामी हुन् । उनले सामान्य अवस्थामा फर्कने एक मात्र उपाय खोप लगाउनु रहेको प्रतिक्रिया दिएका छन् । खोप लगाएपछि आफ्नो ४८ ओैं विवाह उत्सवका लागि आशावादी रहेको उनले बताएका छन् ।
अक्सफोर्ड र आष्ट्राजेनिककाको खोप यो साता करिब ५ लाख मानिसलाई दिने योजना छ । त्यसका लागि सो खोप यस सप्ताहान्तमा नै अस्पताल तथा जीपीहरुमा पुर्याइसकिएको छ ।
अक्सफोर्ड र अस्ट्राजेनिकाको खोपलाई स्वीकृति प्रदान गर्ने बेलायत पहिलो देश हो ।
यसअघि बेलायतले फाइजर र बायोएनटेकको खोपलाई स्वीकृति दिएको थियो । सो खोप हालसम्म १० लाख मानिसहरुलाई दिइसकिएको बताइएको छ ।
निकै सस्तो र वितरणमा निकै सहज मानिएको अक्सफोर्ड र आष्ट्राजेनिकाको खोप कोरोना भाइरसविरुद्धको लडाइँमा प्रभावकारी हुने अनुमान गरिएको छ ।
बेलायतको स्वास्थ्य सेवाका चिकित्सकीय महानिर्देशक प्रोफेसर स्टेफेन पोविसले इतिहासकै सबैभन्दा ठूलो खोप अभियान शुरु भएको बताएका छन् ।
बेलायतले खोप लगाउनका लागि ७३० वटा खोप केन्द्र स्थापना गरिसकेको छ भने यसै साताभित्र १ हजार पुर्याउने योजना बनाएको छ ।
बेलायतले अक्सफोर्डको खोप १० करोड डोज अर्डर गरेको छ ।
