क्रिसमसको समयमा बेलायतमा को को भेट्न पाइने ?

लण्डन । बेलायत सरकारले क्रिसमसको समयमा पाँच दिनको लागि तीन परिवारसम्म भेट्न दिने नियम बनाएको छ ।

बेलायतको चारवटै राज्यहरु इङल्याण्ड, वेल्स, स्कटल्याण्ड र उत्तरी आयरल्याण्डमा चाडवाडका लागि डिसेम्बर २३ देखि २७ सम्म सो नियम ल्याइएको हो ।

सो अवधिमा तीन परिवारका सदस्यहरु घरभित्र र बाहिर भेट्न पाउने छन् तर उनीहरुलाई रेस्टुरेन्ट वा पवहरुमा भेटन भने अनुमति दिइएको छैन । यसरी एउटा क्रिसमस समूहभित्र रहेको परिवारले अर्को क्रिसमस समूह बनाउन पाउने छैन । एउटा परिवार एउटा क्रिसमस समूहमा मात्र रहन पाउने छ । तर सेल्फआइसोलेसनमा रहेकाहरुले भने क्रिसमस समूह बनाउन पाउने छैनन् ।

यसरी बनेका समूहका परिवारले बेलायतभर सो अवधिमा आवतजावत गर्न पाउने छन् । उत्तरी आयरल्याण्ड जाने वा उत्तरी आयरल्याण्डबाट बाहिरिनेलाई भने एक अगावै र एक दिन पछिसम्म पनि आवतजावत गर्न दिइएको छ । घरबाहिर सार्वजनिक स्थानमा भेट गर्न पाउने छन् । प्रार्थना गर्ने स्थानहरुमा सँगै जान पाउने छन् । तर सो समूहबाहेकका अन्यसित भने निजी घरमा भेट्न पाउने छैनन् ।

यसअघि नै रहेका पारिवारिक सहयोगको समूहलाई क्रिसमस समूहमा एक घर मानिने छ र उनीहरुले अन्य दुई घरका सदस्यसित क्रिसमस समूह बनाउन पाउने छन् । विश्वविद्यालयबाट घर आएका विद्यार्थीहरुलाई छुट्टै परिवार मानिने छैन । उनीहरु जुन परिवारका सदस्य हुन् उनीहरुभित्रै गणना गरिने छ ।

घरैभित्र क्रिसमस समूहभित्र बसेर क्रिसमस मनाउँदा पनि झ्याल खोलेर प्रशस्त ताजा हावा कोठामा आउन दिन सुझाव दिइएको छ । यस्तै नियमित हात धुन र नियमित छोइने स्थानहरु नियमित सफा राख्न भनिएको छ ।

यदि डिसेम्बर २३ देखि २७ भित्र क्रिसमस समूहका कोही सदस्यलाई कोरोना भाइरसको संक्रमण भेटिएमा समूहका सबै सदस्यहरु आइसोलेसनमा बस्न पर्नेछ ।

क्रिसमस समूहमा अति नाजुक स्वास्थ्य अवस्था भएका र केयर होममा बसिरहेका परिवारका सदस्यहरुलाई पनि राख्न सकिने छ तर उनीहरुलाई कोरोना भाइरस संक्रमणको जोखिम कम गर्ने उपाय अपनाउन सल्लाह दिइएको छ ।