संविधान निर्माणको प्रक्रिया रोकिए एमालेले सरकार छाड्ने

काठमाडौं। सत्तारूढ दल नेकपा एमालेले संविधानसभाबाट जेठ १५ मा संविधान जारी गर्ने गरी प्रक्रिया अघि नबढाइए नेपाली कांग्रेस नेतृत्वको सरकारमा बसिरहनुको औचित्य नहुने ठहर गरेको छ। एमाले मुख्यालय बल्खुमा सोमबार बसेको स्थायी कमिटी बैठकले कांग्रेससँग नयाँ मार्गचित्रसहित संविधान निर्माण प्रक्रियामा अघि बढ्नुपर्ने निष्कर्ष निकालेको छ।

संविधान निर्माणमा भन्दा कांग्रेस पार्टी महाधिवेशनमा बढी केन्द्रित भएको समीक्षा गर्दै एमालेले संविधान निर्माण र सत्ता साझेदारीमा नयाँ सम्झौता आवश्यक रहेको औंल्याएको छ । एक वर्षअघि माघ ८ मा संविधान जारी गर्ने गरी कांग्रेससँग सम्झौता गरेको भन्दै एमालेले पुरानै सहमतिअनुसार नयाँ परिस्थितिमा अघि बढ्न नसकिने एमालेले जनाएको छ ।

एमालेले सहमति हुने भए पनि कसरी र कति समयमा हुने तथा बहुमतीय प्रक्रियामा जाने भए कसरी भन्ने विषयमा सत्तारूढ दलहरू स्पष्ट हुनुपर्ने निष्कर्ष निकालेको छ । संविधानसभा अनिर्णयको बन्दी बन्न लागेको भन्दै एमालेले सुरु गरिएको प्रक्रियालाई अलपत्र बनाउन नहुने पनि जनाएको छ ।

एमालेले सहमतिका लागि अर्को मिति बिना नै स्थगित गरिएको संविधानसभाको बैठक २० दिन स्थगित हुँदा पनि वार्ता शुरु नहुँदा त्यसप्रति चिन्ता व्यक्त गरेको छ।

अहिलेको अवस्था लम्ब्याउँदा झनै जटिलता उत्पन्न हुने भन्दै एमालेले संविधानसभाले संविधान निर्माण प्रक्रिया अघि बढाउनुपर्ने जनाएको छ ।

सरकारको नेतृत्वकर्ताका साथै सबैभन्दा ठूलो दलको हैसियतमा पनि अबको बाटो कांग्रेसले निर्धारण गर्नुपर्ने भन्दै एमालेले मंगलबार कांग्रेससँग निर्णायक वार्ता गर्ने पनि निर्णय गरेको छ। संविधान निर्माण प्रक्रिया अघि बढाउन कांग्रेस तयार नभए सरकारबाट बाहिरिनु परे पनि तयार रहने एमालेले निर्णय गरेको छ । आइतबार बसेको दुईदलीय बैठकले आगामी बाटो निर्धारण गर्न मंगलबार कांग्रेस र एमालेको बैठक गर्ने सहमति गरेको थियो ।

बैठकमा अध्यक्ष केपी शर्मा ओलीले आइतबार कांग्रेस र एमालेबीच भएको बैठकबारे जानकारी गराउँदै कांग्रेस सभापतिसमेत रहेका प्रधानमन्त्री सुशील कोइराला दलीय सहमतिका नाममा संविधान निर्माण कार्य केहीसमय लम्ब्याउने पक्षमा रहेको सुनाएका थिए ।