कोरोना संक्रमितको उपचारमा नयाँ ओैषधि अति प्रभावकारी

लण्डन । बेलायतको एक बायो टेक कम्पनीले विकसित गरेको ओैषधिले कोरोना भाइरस संक्रमितको उपचारमा महत्वपूर्ण सघाउ पुर्याउने प्रारम्भिक रिपोर्टले देखाएको छ ।

बीबीसीका अनुसार साउदह्याप्टनमा रहेको सिनार्जिन नामक कम्पनीले उत्पादन गरेको ‘एसएनजी००१’ नामक ओैषधि कोरोना संक्रमणबाट गम्भीर रुपमा बिरामी परेकाहरुको उपचारमा प्रभावकारी देखिएको हो ।

यस ओैषधिका कारण अतिसघन कक्ष (आइसियु) मा भर्ना गर्नुपर्ने अवस्थामा कमी ल्याएको शुरुवाती अध्ययनले देखाएको छ । यस ओैषधिका कारण भेन्टिलेसनमा राख्नुपर्ने अवस्थामा ७९ प्रतिशतले कमी ल्याउन सक्ने बताइएको छ ।

यो ओैषधि भाइरल संक्रमणका कारण शरीरले बनाउने प्रोटिनबाट बनाइएको हो र यसलाई ‘इन्टरफेरोन बेटा’ नाम दिइएको छ।

कोरोना भाइरसका बिरामीलाई श्वासबाट यो ओैषधि दिइने यस ओैषधिले प्रतिरोधात्मक क्षमतालाई तीव्र बनाउन सहयोग गर्ने बताइएको छ । यस ओैषधिका कारण बिरामीहरु छिटो सन्चो हुने आशा गरिएको छ ।

उत्पादक कम्पनीले श्वासप्रश्वासको समस्या समाधान गर्नमा यो ओैषधि अति महत्वपूर्ण हुनसक्ने संकेत देखिएको बताएको छ । यस्तै बिरामीहरुको अस्पतालको बसाइ पनि एक तिहाइले घटेको प्रारम्भिक अध्ययनमा देखिएको छ । यस ओैषधि लिइरहेका बिरामीहरु ६ दिनमै घर फर्केका छन् जबकि ओैसतमा उनीहरुको अस्पताल बसाइ ९ दिन रहने गर्दथ्यो ।

बेलायतका विभिन्न अस्पतालमा १०१ जना बिरामीहरुमा यो ओैषधि दिइएको थियो ।

तर यस अध्ययन अत्यन्त सानो भएको बताइएको छ । यस परीक्षणका प्रमुख टोम विल्किन्सनले यदि ठूलो अध्ययनले पनि यस्तै परिणाम देखाए यो नयाँ उपचार ‘गेम चेंजर’ हुने बताएका छन् ।

उत्पादक कम्पनीका प्रमुख रिचर्ड मार्सडनले योभन्दा राम्रो परिणाम आशा नगरिएको बताए । उनले अहिले देखिएको नतिजा कोभिड १९ का बिरामीको उपचारमा यो ठूलो सफलता भएको प्रतिक्रिया दिए ।

कम्पनीले अध्ययनको नतिजाहरुलाई विभिन्न नियामक निकायहरुमा प्रस्तुत गर्ने योजना बनाएको छ र यसबाट आगामी दिनमा उपचारका लागि अनुमति प्राप्त हुने आशा राखिएको छ । तर ब्रिटिश नियामकबाट अनुमति प्राप्त गर्न लामो समय लाग्ने गर्छ ।

कम्पनीले जाडो मौसममा हरेक महिना १ लाख डोज उपलब्ध गराउने बताएको छ ।