कोरोनाविरुद्ध खोप निर्माणमा अक्सफोर्ड विश्वविद्यालयलाई ठूलो सफलता

लण्डन । अक्सफोर्ड विश्वविद्यालयले कोरोना भाइरसका विरुद्ध विकास गर्दै गरेको खोपमा ठूलो प्रगति हासिल गरेको अनुसन्धाताहरुले बताएका छन्

खोपको मानिसहरुमा गरिएको परीक्षणले आशालाग्दो नतिजा देखाएको र भारइसविरुद्ध दोहोरो सुरक्षा दिनसक्ने बताइएको छ ।

खोपको पहिलो चरणको परीक्षणमा सहभागी स्वयंसेवकहरुबाट लिइएको रगतको नमूनामा खोपले शरीरमा एण्टीबडिज र टी सेलहरु उत्पादन गर्नमा सहयोग गरेको पाइएको डेली टेलिग्राफमा प्रकाशित समाचारमा उल्लेख छ। टी सेलहरु शरीरमा प्रतिरोधात्मक क्षमता विकास गर्नमा महत्वपूर्ण हुने गर्छन् ।

स्रोतलाई उद्धृत गर्दै समाचारमा एण्टीबडिज र टी सेलहरुको संयोजनले मानिसहरुलाई सुरक्षित राख्ने आशा गरिएको छ ।

कोरोना भाइरस विरुद्ध परीक्षण गरिएका गरिँदै गरिएका सयभन्दा बढी खोपमध्ये अक्सफोर्ड विश्वविद्यालयको पनि एक हो ।

सो खोपको परीक्षणलाई अनुमति दिने वर्कसायर रिसर्च इथिक्स कमिटीका अध्यक्ष डेभिड कार्पेन्टरले अक्सफोर्ड विश्विवद्यालयको खोप बिल्कुल सही दिशामा अघि बढिरहेको बताए ।

उनले भने, ‘कसैले पनि  खोप बजारमा आउने अन्तिम मिति दिन सक्दैन किनकि परीक्षणले सही नतीजा नदिन पनि सक्छ । तर धेरै ठूलो ओैषधि निर्माता कम्पनीसित सहकार्य गरिएकाले खोपको परीक्षण सही दिशामा गए सेप्टेम्बर महिनामा खोप बजारमा ल्याउन सकिने छ र सोही लक्ष्यका साथ कामहरु भइरहेको छ ।’

खोपको विकास बेलायत सरकार र ओैषधि उत्पादक कम्पनी आष्ट्रजेन्काको सहयोगमा भइरहेको छ ।

आष्ट्राजेन्काका प्रमुख कार्यकारी अधिकृतले गत महिना पहिलो चरणको परीक्षण सकिन लागेको र तेस्रो चरणको परीक्षण शुरु हुनै लागेको बताएका थिए । तेस्रो चरणमा खोपको प्रभावकारिता र सुरक्षा परीक्षण गरिन्छ ।

खोपले काम गर्ने यकिन भइनसके पनि ओैषधि निर्माता कम्पनी भने विश्वभर दुई अर्ब खोप उत्पादन गर्ने बताइसकेको छ ।

यदि यो खोपले काम गरेमा सबैभन्दा पहिला अतिजोखिममा रहेका वृद्धवृद्धाहरु र स्वास्थ्यकर्मीहरुलाई दिइने कार्पेन्टरले बताए । यस्तै प्राविधिकहरु,नर्स, जीपीहरु र ओैषधि बनाउने व्यक्तिहरुलाई पनि यो खोप शुरुवाती चरणमा दिइने छ ।