करिब तीस लाख हङकङबासीलाई बेलायतको नागरिकता दिइने

लण्डन । करिब ३० लाख हङकङबासीलाई बेलायतको नागरिकता दिइने भएको छ ।

बेलायतका प्रधानमन्त्री बोरिस जोन्सनले आज सो घोषणा गरेका हुन् ।

चीन सरकारले हङकङमा नयाँ सुरक्षा कानुन ल्याएपछि बेलायत सरकारको सो घोषणा आएको हो । यसअघि गत महिना सो कानुन चिनियाँ संसदमा पेश हुँदा बेलायती विदेशमन्त्री करिब ३ लाख हङकङमा रहेका बेलायती राहदानीबाहकलाई बेलायतको नागरिकता दिने बताएका थिए ।

सरकारले पाँच वर्षको अवधिमा उनीहरुलाई बेलायतको नागरिकता दिने योजना बनाएको छ ।

बेलायत सरकारले पूर्व उपनिवेशका रुपमा रहेको हङकङमा जन्मिएकाहरुलाई ब्रिटिश न्यानशल ओभरसिज (बीएनओ)राहदानी दिएको थियो । सो राहदानीका आधारमा उनीहरु बेलायत आउन र छ महिनासम्म बसोबास गर्न पाउँथे ।

सरकारको योजनाअनुसार बीनीओ पासपोर्टबाहक र उनीहरुका आश्रितहरुलाई पाँच वर्षका बेलायतमा आइएलआर दिइनेछ । जसबाट बेलायतमा काम गर्ने हक, पढ्न पाउने हक मिल्नेछ । यसपछि उनीहरुले नागरिकताका लागि आवेदन गर्नसक्नेछन् ।

बेलायत सरकारले आज गरेको घोषणाबाट हङकङमा रहेका बीएनओ पासपोर्टबाहक नेपालीहरु र उनीहरुका आश्रितहरुलाई पनि बेलायत आउने बाटो खुल्नेछ ।