प्रथम गोरखा भिसीको शालिक बनाउन १ लाख पाउण्ड बढीको प्रतिवद्धता

 

लण्डन । बेलायतको सर्वोच्च सैन्य पदक भिक्टोरिया क्रस प्राप्त गर्ने प्रथम गोर्खा सैनिक कुलवीर थापामगरको बेलायतको अल्डरसटस्थित प्रिन्सेस पार्कमा बनाउन लागिएको शालिकका लागि नेपाली समुदायबाट १ लाख पाउण्डभन्दा बढीको प्रतिवद्धता व्यक्त भएको छ ।

शालिक निर्माणका लागि गठित समितिका प्रवक्ता ओमप्रसाद थापाका अनुसार बिहीबार बिहानसम्ममा ८९ जना दाता व्यक्ति वा संघ संस्थाबाट जनही १ हजार पाउण्डभन्दा बढीको प्रतिवद्धता प्राप्त भइसकेको छ ।

समितिले १ हजार पाउण्डभन्दा बढी चन्दा दिने १२५ जना दाताको नाम शालिकसँगै शिलालेखमा अंकित गर्ने घोषणा गरेकोमा अब ३७ जना व्यक्ति वा संस्थाको मात्र नाम टङ्कन गर्न सकिने उनले जानकारी दिए । ‘प्रथम भिसीको सालिकका लागि प्राप्त हुने सहयोग अस्वीकार गर्दैनौँ तर शिलालेखमा १२५ वटाभन्दा बढी स्थान दिन असमर्थ छौँ’ उनले भने ।

१२५ स्थानमा अब बाँकी स्थान पहिले आउनेलाई प्राथमिकताका आधारमा दिइने उनले बताए ।

शालिक निर्माणको लागि १ लाख २५ हजार पाउण्ड लाग्ने पूर्वानुमान गरिएको छ । जसमा आधा रकम शालिक बनाउनका लागि लाग्ने छ ।

प्रक्षेपण गरिएभन्दा बढी सहयोग उठेको खण्डमा के गर्नुहुन्छ भन्ने प्रश्नको जवाफमा थापाले गोरखा वेलफेयर ट्रष्ट र स्थानिय च्यारिटीलाई दिने बताए ।

शालिक निर्माणमा स्थानीय रसमुर काउन्सिलले स्थान तथा मर्मतसम्भारको जिम्मा लिएको छ भने ग्रेटर रसमुर नेपाली कम्युनिटीमार्फत नेपाली समुदायले शालिक निर्माण र प्रतिस्थापनवापत लाग्ने खर्चको जिम्मा लिएका छन् ।