कर्णेल लामाद्वारा अदालतमा बयान दिन इन्कार

लन्डन । सरकार माओवादी सशस्त्र द्वन्द्वकालताका यातना दिएको अभियोगमा बेलायतमा मुद्दा खेपिरहेका कर्णेल कुमार लामाले अदालत समक्ष बयान दिन इन्कार गरेका छन् ।

लन्डनस्थित सेन्ट्रल क्रिमिनल कोर्टमा मुद्दाको सुनुवाइ जारी रहंदा नेपाली सेनाका महासेनानी लामाले आफ्नो वकिल मार्फत बयान नदिने बताएको श्रोतले उल्लेख गरेको छ ।

समाचार अनुसार, सुनुवाइको अध्यक्षता गरिरहेका न्यायाधीश जस्टीस स्वीनीले लामालाई बयान दिने वा नदिने भनि सोधेका थिए । गत महिना देखि १२ सदस्यीय जुरीले उनको मुद्दामा केन्द्रिय फौज्दारी अदालत ओल्ड बेलीमा सुनुवाइ गरिरहेको छ ।
जारी सुनुवाइमा अभियोजन पक्षबाट विज्ञ तथा साक्षीहरुले अदालत समक्ष बयान दिइसकेका छन् । गत वर्ष भने अभियोजन पक्षले दोभासे नपाएपछि मुद्दा स्थगित भएको थियो ।

कर्णेल लामा विरुद्ध सन् २००५ मा कपिलवस्तुको गोरुसिंगेस्थित एक सैनिक व्यारेकमा थुनामा रहेका दुई सर्वसाधारणलाई चरम यातना दिएको अभियोग छ ।

लामा दक्षिण सुडानस्थित राष्ट्रसंघीय मिसनमा कार्यरत रहेकै बेला छुट्टीमा परिवार भेट्न बेलायत आउंदा लामा गत जनवरी २०१३ मा बेलायती प्रहरीबाट समातिएर करिब अढाइ महिनापछि धरौटीमा रिहा भएका थिए । तत्कालिन समयमा नेपाल सरकारले राष्ट्रसंघमा कार्यरत रहेकै अवस्थामा सार्वभौम देशको एकजना वरिष्ठ सैनिक 
अधिकारीलाई पक्राउ गरिएकामा विरोध जनाएको थियो ।

तत्कालिन प्रधानमन्त्री बाबुराम भट्टराईले लामालाई तत्काल रिहा गर्न माग गर्दै ब्रिटिश प्रधानमन्त्री डेभिड क्यामरनलाई पत्र समेत लेखेका थिए ।

गत पुषमा बेलायतको औपचारिक भ्रमणका क्रममा उपप्रधान तथा परराष्ट्रमन्त्री कमल थापाले कर्णेल लामाको मुद्दा छिटो टुंगो लगाइदिन बेलायत सरकारसमक्ष अनुरोध गरेका थिए । मन्त्री थापाले बेलायतका लर्ड चान्सलर एवं कानुनमन्त्री माइकल गोभलाई भेटी नेपालमा संक्रमणकालिन न्यायमा सुधार भइरहेको र सत्य निरुपण तथा मेलमिलाप आयोग गठन भइसकेको पृष्ठभूमिमा लामो समयदेखि मुल्तवीमा रहेको कर्णेल लामाको मुद्दा टुंग्याइदिन अनुरोध गरेका थिए । इकान्तिपुर