राष्ट्रपति भण्डारी लुम्बिनीमा

नवलपरासी, ७ जेठ । राष्ट्रपति विद्यादेवी भण्डारी केही समयअघि लुम्बिनी आइपुग्नुभएको छ । हेलिकप्टरबाट अपरान्ह १२ बजेतिर लुम्बिनी आइपुग्नुभएका राष्ट्रपति भण्डारीले लुम्बिनीमा केहीबेर पूजाअर्चना गर्ने कार्यक्रम छ ।

पूजाअर्चनापछि दिउँसो कपिलवस्तुको तिलौराकोट र नवलपरासीको रामग्राम स्तुपक्षेत्रको अवलोकनका लागि त्यसतर्फ जनुहुनेछ ।

२५६० औँ बुद्ध जयन्तीको पूर्व सन्ध्यामा राष्ट्रपति भण्डारी बुद्धजन्मस्थल लुम्बिनीसहित बुद्धसँग सम्बन्धित स्थल कपिलवस्तुको तिलौराकोट र नवलपरासीको रामग्राम स्तुप क्षेत्रको अवलोकन गर्न आज यसतर्फ आउनुभएको हो ।

राष्ट्रपति भण्डारी नेपाली सेनाको बुटवलस्थित २२ नम्बर बाहिनीमा बस्ने कार्यक्रम रहेको बज्रदल गण नवलपरासीका सेनानी पूर्णप्रसाद ढकालले जानकारी दिनुभयो । राष्ट्रपति भण्डारीले शनिबार लुम्बिनीमा आयोजित २५६० औँ बुद्धजयन्ती मूल समारोहलाई उद्घाटन गर्नुहुनेछ ।

राष्ट्रपति भण्डारीद्वारा मायादेवी मन्दिरमा पूजा

राष्ट्रपति भण्डारीले आज भगवान् गौतम वुद्धको जन्मस्थल लुम्बिनीस्थित मायादेवी मन्दिरमा पूजाआजा गर्नुभयो ।

उहाँले मन्दिर परिसरको अवलोकन गर्नुका साथै यहाँको अवस्थाबारे जानकारी लिनुभएको थियो । उक्त अवसरमा राष्ट्रपति भण्डारीलाई लुम्बिनी विकास कोषका सदस्यसचिव अजितमान तामाङ्ले बृहद लुम्बिनीको गुरुयोजनाबारे जानकारी गराउनुभएको थियो ।

एक हजार १५६ वर्ग माइल क्षेत्रफलमा फैलिएको लुम्बिनीको अवस्था अवलोकन गर्दै उहाँले यसको विकास तथा संरक्षणबारे चासो राख्नुभएको थियो । राष्ट्रपति भण्डारी अहिले कपिलवस्तुको तिलौराकोटतर्फ प्रस्थान गर्नुभएको छ । राष्ट्रपति भोलि हुने बुद्ध जयन्ती समारोहमा भाग लिन लुम्बिनी आउनुभएको हो ।