काठमाडौँ, २० वैशाख । संयुक्त राष्ट्र सङ्घका उपमहासचिव जान केन्नेथ इलियासनले नेपालमा भूकम्पपछिको पुनःनिर्माणमा अन्तर्राष्ट्रिय समुदाय साथमा रहेको बताउनुभएको छ ।
ललितपुरको बुङ्मतीमा सम्पदा पुनःनिर्माणको अवलोकन गर्दै उहाँले ठूलो विपत्तिले भत्काएको संरचनाको पुनःनिर्माण चुनौतीपूर्ण छ, पाइला पाइला चालेपछि बलियो र राम्रो संरचना बन्नेछ भन्नुभयो ।
“सरकारका साथसाथै अन्तर्राष्ट्रिय समुदाय, निजी क्षेत्र नागरिक समाजसँगको सहकार्य र साझेदारीमा मात्र विपद्पछिको पुनःनिर्माण सम्भव हुन्छ”, उहाँले भन्नुभयो । नेपालमा भइरहेको पुनःनिर्माणको कामलाई लिएर टर्कीमा आयोजना हुने अन्तर्राष्ट्रिय सम्मेलनमा कार्यपत्र पेस गर्दा नेपालको पुनःनिर्माणको विषय समावेश गर्ने जानकारी पनि उहाँले दिनुभयो । स्वदेशी र विदेशी सीप एवम् क्षमतालाई प्रयोग गरेर अघि बढ्न पनि नेपाल पुनःनिर्माण प्राधिकरणका प्रमुख कार्यकारी अधिकृत सुशील ज्ञवालीलाई सुझाव दिनुभयो ।
प्रमुख कार्यकारी अधिकृत ज्ञवालीले पुनःनिर्माणमा सबै आधार तयार भएकाले सबैको साथ र सहयोग लिएर अघि बढ्ने प्रतिबद्धता जनाउनुभयो । “ललितपुरको बुङ्मती र खोकनाका आठ वडामा नापजाँच सम्पन्न भएको छ, गुरुयोजना अन्तर्गतका कार्यक्रम ल्याउन कार्यविनायक नगरपालिका लाग्नुपर्छ, यसमा स्थानीयवासीले साथ दिनुपर्छ”–उहाँले भन्नुभयो ।
नापजाँच सुरु गरिएको ४० दिनमा यस क्षेत्रका दुई हजार ५७४ घरधुरीको सर्भेक्षण सम्पन्न भएको जनाइएको छ । यस क्षेत्रका अनुदान पाउनयोग्य घरधुरीको सूची सार्वजनिक गरी अनुदान सम्झौता प्रक्रिया अघि बढाउन लागिएको प्राधिकरणले जनाएको छ ।
