मक्का भागदौडमा पाँच नेपालीसहित ७१७ को मृत्यु, ८०० भन्दा बढी घाइते

साउदी अरब, ८ असोज । साउदी अरेबियाको मक्कामा हज गर्ने क्रममा बुधबार राति भागदौड मच्चिँदा पाँच नेपालीसहित ७१७ तीर्थयात्रुको मृत्यु भएको छ भने ८०५ भन्दा बढी घाइते भएका छन् । घाइते हुनेको सङ्ख्या अझै बढ्न सक्ने अनुमान गरिएको छ ।

भागदौडमा परी नेपालबाट हज गर्न आएका पर्साका जाकिर हुसेन, बाराका इजहर मियाँ र बाराकै सुलेमानी मियां र रफिक मियाको मृत्यु भएको साउदीका लागि कार्यवाहक राजदूत आनन्दप्रसाद शर्माले जानकारी दिनुभयो । चार जना नेपाली तीर्थयात्रीको बिहीबारनै मृत्यु भएको र एक जना बाँकेका बरक तुल्लाको गएराति मृत्यु भएको कार्यवाहक राजदूत शर्माले बताउनुभयो ।

हज कमिटीका केन्द्रीय अध्यक्ष ताज मोहम्मद मियाँको नेतृत्वमा यो वर्ष नेपालबाट एक हजारभन्दा बढी नेपाली हज गर्न साउदीको मक्का आएको दूतावासले जनाएको छ । हजको दोस्रो दिन मक्का नजिकै रहेको मीना भन्ने स्थानमा शैतानलाई ढुङ्गा हान्ने धार्मिक कार्यमा अचानक भागदौड मच्चिँदा सो दुर्घटना भएको थियो ।

अधिकारीहरुका अनुसार घटनामा परेकालाई उद्धार गर्नका लागि चार हजारभन्दा बढी साउदी सुरक्षा सेना र स्वयम्सेवक खटिएका छन् । मृत्यु हुनेको सङ्ख्या धेरै भएका कारण सबै शवको यकिन भइनसकेको साउदी अधिकारीले जनाएका छन् ।

विश्वका मुस्लिम समुदायको सबैभन्दा ठूलो पवित्र तीर्थस्थलका रुपमा रहेको उक्त स्थानमा हज गर्न यस वर्ष २० लाखभन्दा बढी मुस्लिम समुदाय सहभागी भएका छन् ।