उत्कृष्ट प्रतिभालाई ‘ब्रिटिस गोर्खा अवार्ड’ प्रदान गरिने

काठमाडौँ, ३१ भदौ । बेलायतमा रहेका नेपालीको संस्था ब्रिटिस गोर्खा नेपाली परिषद्ले हरेक वर्ष उत्कृष्ट नेपाली प्रतिभालाई वार्षिक रुपमा ‘ब्रिटिस गोर्खा अवार्ड’ प्रदान गर्ने भएको छ ।

कला, साहित्य, पत्रकारिता, सङ्गीत र खेलकुद क्षेत्रमा राष्ट्रिय तथा अन्तर्राष्ट्रिय क्षेत्रमा उच्च योगदान पुरयाउने नेपाली प्रतिभालाई सो सम्मान प्रदान गरिने आयोजकले जनाएको छ ।

परिषद्ले आज यहाँ आयोजना गरेको कार्यक्रममा नेपाल प्रज्ञाप्रतिष्ठानका पूर्वकुलपति वैरागी काइँला र संस्कृतिविद् तुलसी दिवसले विश्वयुद्वमा नेपालीले खेलेको भूमिका अत्यन्त महत्वपूर्ण भएको बताउँदै घोषणा गरिएको अवार्डलाई अन्तर्राष्ट्रियस्तरको बनाउनुपर्नेमा जोड दिनुभयो ।

भिक्टोरिया क्रस विजयी बेलायती सेनाका क्याप्टेन रामबहादुर लिम्बूले गोर्खाली बन्नलाई कठोर सङ्घर्ष गर्नुपर्ने बताउनुभयो । परिषद्का उपाध्यक्ष किरण टी लिम्बू, राजनीतिक विश्लेषक डा सुरेन्द्र केसीलगायतले दोस्रो विश्वयुद्धमा एक लाख ५० हजार गोरखाली सेनामा भर्ती भएर नेपालको अर्थतन्त्रमा महत्वपूर्ण भूमिका खेलेको बताउनुभयो ।

आजै नेपाल शाखामा पूर्वमिस नेपाल सुविन लिम्बूको संयोजकत्वमा नयाँ समिति गठन गरिएको छ जसको सहसंयोजकमा प्रवीन पुमा, कोषाध्यक्षमा सम्झना राई, सदस्यमा गोविन्द राई, अशोक प्यासी राई, नवीन गुरुङ, स्वप्नील स्मृति, प्रकृति थुलुङ, युवराज गौतम, ताराप्रकाश लिम्बू, मनोज नेम्वाङ र विमला भण्डारी हुनुहुन्छ ।