एनआरएनए युके सदस्य संख्या ४ हजार २ सय ३५

लन्डन । गैर आवासीय नेपाली संघ बेलायत निर्वाचन समिति २०१५ लाई ४ हजार २ सय ३५ सदस्यता प्राप्त भएको छ ।
लण्डनस्थित निर्वाचन समितिको कार्यालय एक्टनटाउनमा सोमबारसम्म प्राप्त सदस्य फारमका आधारमा उक्त संख्या देखिएको हो । तर, प्राप्त सदस्यता निवेदन मध्ये रित नपुगेका सदस्यता फारमहरु केलाउने क्रम सुरु भएको छ ।

निर्वाचन समिति सदस्य सचिव रामशरण सिंखडाका अनुसार केही सदस्यता फारमहरु एकै ठाउँबाट क्यास डिपोजिट गरिएको पाइएको छ । ‘सदस्यता फारममा देखिएका समस्याहरुलाई एकै ठाउँमा राखि एनआरएनए युके कार्यसमिति र निर्वाचन समितिको संयुक्त टोलीले समस्याबारे अन्तिम निर्णय लिनेछ’, निर्वाचन समिति सदस्य सचिव सिंखडाले वीनेपालीसँग भने । उनका अनुसार निर्वाचन समितिले तोकेको मापदण्ड अनुसार नै कार्य गर्नेछ । ‘रित नपुगेका सदस्यता फारममा निर्वाचन समितिले सम्झौता गर्दैन, हामीले पाएको म्याण्डेट अनुसार काम हुन्छ’, सिंखडाले भने । यता, निर्वाचन समितिले सदस्यहरुको अभिलेख राख्ने काम पनि सुरु गरेको छ ।