दुई सय भूपू गोर्खा विरोध प्रदर्शनका लागि स्कटल्याण्ड जांदै

लन्डन । आफूहरुलाई अन्याय गरिएको भन्दै ब्रिटिश सेनामा गोर्खा प्रवेशको दुई सय वर्ष गांठ कार्यक्रम ‘वहिष्कार’ गरिरहेका भूपू गोर्खाहरुले अगष्ट दोश्रो साता स्कटल्याण्डमा प्रदर्शनको तयारी गरेका छन् । १२ घण्टा धर्ना दिने र स्कटिससंग न्यायका लागि अनुनय गर्ने गोर्खाहरुको सोच छ ।

गोर्खाहरुले विश्वभरबाट करिव १०० मिलियन दर्शकले अवलोकन गर्ने ठानिएको दि रोयल एडिनबरा मिलिट्री टट्टुका बेला विरोध प्रदर्शनको तयारी गरेका हुन् ।

‘विश्वलाई हामीमाथि भइरहेको अन्यायबारे अवगत गराउन लन्डनबाट दुई सय भूपू गोर्खाहरु स्कटल्याण्ड जाने तयारीमा छौं’, गोर्खा सत्याग्रह संयुक्त संघर्ष समितिका निर्देशक ज्ञानराज राईले वीनेपालीसंग भने ।

गोर्खा सत्याग्रह संयुक्त संघर्ष समितिले आगामी १० देखि १४ अगष्टसम्म विरोध प्रदर्शनको कार्यक्रम तय गरेको हो ।

विरोध प्रदर्शन, १२ घण्टे धर्ना र स्कटिस प्रथम मन्त्री निकोला स्टरजनलाई भेटेर ज्ञापनसहित आफूलाई न्याय दिलाइदिन अपिल गरिने समितिका गोर्खा दूत डा. रामनारायण कन्दङ्वाले जनाए ।

‘लर्डस् प्रशंसा गर्छन्, क्यामरुन दिंदैनन्’
हाउस अफ लर्ड्स मा गोर्खा योगदानको पर्याप्त तारिफ भएपनि प्रधानमन्त्री डेभिड क्यामरुन चाहिं गोर्खा माग सुन्नै नचाहेको गुनासो गोर्खाहरुको छ ।

जुन दोश्रो साता हाउस अफ लर्ड्स मा भएको गोर्खा वहसमा ८ जना लर्डस् र एक जना ब्यारोनेसले गोर्खा पक्षमा खुलेर प्रशंसा गरेको कन्दङ्वाले जनाए । ‘गोर्खाहरुले हाम्रा लागि यति गरे कि हामी हजार वर्ष सम्म ऋणी भइरहनुपर्छ । उनीहरुलाई प्रशंसा गरेर मात्र हुन्न, प्रशंसाले भोको पेट भरिन्न । समय, युग सापेक्ष व्यवहार पनि गर्नुपर्छ,’ ति लर्डस्ले वहसमा बोलेको कुरा उधृत गर्दै कन्दङ्वाले जनाए ।

तर, प्रधानमन्त्रीलाई गोर्खा मागमा वास्ता छैन् । गत वर्ष सर्वदलीय संसदीय समितिको प्रतिवेदनपछि पनि आफ्ना प्रमुख माग संवोधन नगरिएको भन्दै भूपू गोर्खाहरुले क्यामरुनलाई हालै ‘फ्रेस’ ज्ञापन पठाएका थिए । ज्ञापनको औपचारिक प्रतिउत्तरमा क्यामरुनले गोर्खाहरुलाई धेरै गरिएको ‘रेडिमेड’ जवाफ पठाएपछि गोर्खाहरु रुष्ट छन् । उनीहरुले आगामी वर्ष २४ अप्रिलसम्म माग सुनुवाइ नभए गत वर्षकै जस्तो पुनः आमरण अनसन बस्ने चेतावनी दिइसकेका छन् । ‘हामीलाई रहर लागेको होइन, वाध्यता हो’, कन्दङ्वा भन्छन् ।