नेपाली राजदूतावास लन्डन परिसरमा नेपाली बालबालिकाले गरे वृक्षरोपण

लन्डन । नेपाली राजदूतावास लन्डन परिसरमा शनिबार नेपाली बालबालिकाहरुले वृक्षरोपण गरेका छन् ।

गैरआवासीय नेपालीका सन्ततिहरूलाई नेपालसँग जोड्ने उद्देश्यले दूतावासले आयोजना गरेको ‘वान चाइल्ड, वान प्लान्टः अ डे एट द नेपाल एम्बेसी’ कार्यक्रमअन्तर्गत विद्यार्थीहरुले बिरुवा रोपेका हुन् ।

शनिबार बिहानै बेलायतका विभिन्न विद्यालयमा अध्ययनरत ५ देखि १५ वर्ष उमेर समूहका नेपालीमूलका बालबालिका केन्सिङ्गटन प्यालेस गार्डेन्सस्थित दूतावास परिसरमा भेला भए । आफ्ना अभिभावकसँग भेला भएका करिब ४० जना विद्यार्थीहरुले रमाईरमाइ दूतावास परिसरमा फूल तथा बिरुवा रोपेका हुन् ।

बालबालिकाहरूलाई राजदूतावास भ्रमण गराउनुका साथै नेपालप्रतिको लगाव अभिवृद्धि गर्ने, नेपाली संस्कृति र मूल्य मान्यताप्रति सचेत गराउने तथा वातावरणीय चेतना विकास गराउने उद्देश्यले कार्यक्रम राखिएको बेलायतका लागि नेपालका कार्यवाहक राजदूत विपिन दुवाडीले बताउनुभयो ।

रचनात्मक कार्यक्रम आयोजना गरेकोमा बालबालिका तथा अभिभावकले दूतावासलाई धन्यवाद दिए ।