गोर्खा सैनिक र उनीहरुका सन्ततिको नागरिकता निरन्तरताबारे नेपालका राष्ट्रपति पौडेललाई बुझाइयो ज्ञापनपत्र

काठमाडौं । बेलायतमा बसोबास गरिरहेका गोर्खा सैनिक तथा उनीहरूका सन्ततिको नेपाली वंशज नागरिकता निरन्तरतासम्बन्धी माग राख्दै संयुक्त प्रतिनिधिमण्डलले बिहीबार नेपालका राष्ट्रपतिसमक्ष ज्ञापनपत्र पेस गरेको छ।

सीएनसीबीजी र भूपू सैनिक कल्याणकारी समिति नेपालको संयुक्त टोलीले शीतल निवास पुगेर राष्ट्रपति रामचन्द्र पौडेललाई उक्त मागसहितको ज्ञापनपत्र बुझाएको हो । कार्यक्रमको उद्देश्यबारे भूपू सैनिक कल्याणकारी समितिका सचिव तथा वरिष्ठ अधिवक्ता चेतबहादुर आलेले संक्षेपमा प्रस्ट पार्नुभएको थियो । साथै सीएनसीबीजीको तर्फबाट तयार पारिएको ज्ञापनपत्र पनि वाचन गरिएको थियो। त्यसपछि सीएनसीबीजीका अध्यक्ष थर्क रानाले राष्ट्रपतिसमक्ष ज्ञापनपत्र बुझाउनुभएको थियो । ज्ञापनपत्रमा बेलायतमा बसोबास गरिरहेका गोर्खा सैनिक तथा उनीहरूका सन्ततिको नेपाली नागरिकता निरन्तरताको मागलाई राज्यले यथाशीघ्र सम्बोधन गर्नुपर्ने उल्लेख गरिएको छ।

ज्ञापनपत्र बुझ्दै राष्ट्रपति पौडेलले गोर्खा सैनिक र उनीहरूको योगदान विशेष रहेको उल्लेख गर्दै उनीहरूको नागरिकतासम्बन्धी जायज मागलाई सरकारसमक्ष पठाउने आश्वासन दिनुभएको छ । उहाँले गोर्खा सैनिकहरू अन्य देशमा रहेका गैरआवासीय नेपालीभन्दा फरक र विशेष सम्मान प्राप्त समूह भएको पनि बताएका सीएनसीबीजीका अध्यक्ष थर्क रानाले जानकारी दिनुभयो ।