नेपालको प्रतिनिधिसभाको सभामुखमा डोलप्रसाद अर्याल निर्विरोध निर्वाचित भएको घोषणा

काठमाडौँ । नेपालको प्रतिनिधिसभाको सभामुखमा डोलप्रसाद (डीपी) अर्याल निर्विरोध निर्वाचित भएका छन् ।

सिंहदरबारमा आइतबार बसेको प्रतिनिधिसभा बैठकमा ज्येष्ठ सदस्य अर्जुननरसिंह केसीले एक मात्र उम्मेदवारी परेकाले अर्याल निर्विरोध निर्वाचित भएको घोषणा गर्नुभएको हो ।

बैठकमा राष्ट्रिय स्वतन्त्र पार्टीका सभापति रवि लामिछानेले अर्याललाई सभामुख पदमा निर्वाचित गरियोस् भन्ने राखेको प्रस्ताव पारित भएको हो । उक्त प्रस्तावलाई अर्थमन्त्री स्वर्णिम वाग्ले, कानुन, न्याय तथा संसदीय मामिलामन्त्री सोविता गौतम, भौतिक, पूर्वाधार तथा यातायात एवं शहरी विकासमन्त्री सुनिल लम्सालले समर्थन गर्नुभएको थियो ।

अर्याल २१ फागुनमा सम्पन्न प्रतिनिधिसभा सदस्य निर्वाचनमा काठमाडौं-९ बाट निर्वाचित भएका हुनुभएको थियो ।