नेपाली विद्यार्थीको शव स्वदेश पठाउन बेलायतमा उठ्यो साढे १० हजार पाउन्ड

लन्डन । बेलायतमा निधन भएका नेपाली विद्यार्थी विवेकानन्द मण्डलको शव नेपाल पठाउनका लागि थालिएको चन्दा अभियानमा साढे १० हजार पाउन्ड संकलन भएको छ ।

‘गो फण्ड मी’मार्फत सोमबार बिहानसम्म १० हजार ५५८ पाउन्ड रकम संकलन भइसकेको एनआरएनए युकेले जानकारी दिएको हो । एनआरएनए यूकेका अध्यक्ष राजेन्द्र पुडासैनीले चन्दा संकलन अभियान बन्द गरिएको समेत जानकारी गराउनुभयो ।

‘हामीले स्व मण्डलको परिवारको अनुरोधमा सहयोग संकलन अभियान सुरु गरेका थियौं । सोमबार बिहानसम्म ‘गो फण्ड मी’मार्फत १० हजार ५ सय ५८ पाउन्ड सहयोग रकम संकलन भइसकेको छ । त्यसैले सहयोग संकलन अभियान बन्द गरिएको जानकारी गराउन चाहन्छौं,’ अध्यक्ष राजेन्द्र पुडासैनीले भन्नुभयो । उहाँले यो मानवीय अभियानमा सहयोग गर्ने युकेवासी सम्पूर्ण नेपाली समुदायप्रति कृतज्ञता पनि व्यक्त गर्नुभएको छ ।

कानुनी प्रक्रिया पूरा भएपछि आउँदो साता शव नेपाल पठाउने योजना बनाइएको पुडासैनीले बताए । ‘अस्पतालको कोरोनर विभागले ‘आउट अफ इंग्ल्यान्ड’ सर्टिफिकेट जारी गरेपछि नेपाली दूतावास लन्डनबाट अनुमति लिएर शव पठाउने योजना छ’, उहाँले भन्नुभयो ।

हनुमाननगर कंकालिनी नगरपालिका – १० सप्तरी निवासी २२ वर्षीय मण्डलको सन्डरल्याण्ड रोयल हस्पिटलमा उपचारका क्रममा गत सोमबार निधन भएको थियो । श्वासप्रश्वासमा एक्कासी समस्या आएपछि मण्डल अस्पताल भर्ना हुनुभएको थियो । उहाँको उपचारको क्रममा निधन भएको हो ।

सन् २०२३ सेप्टेम्बरमा कम्प्युटर साइन्समा अण्डरग्र्याजुएट पढ्न आएका मण्डल केही महिनादेखि फोक्सो र श्वासप्रश्वास समस्याबाट पीडित हुनुहुन्थ्यो ।