एनआरएनए यूकेका पूर्वउपाध्यक्ष कँडेल महान्याधिवक्तामा नियुक्त

काठमाडौँ । गैर आवासीय नेपाली संघ (एनआरएनए) यूकेका पूर्वउपाध्यक्ष तथा अधिवक्ता डा नारायणदत्त कँडेल महान्याधिवक्तामा नियुक्त हुनुभएको छ ।

नेपालका राष्ट्रपति रामचन्द्र पौडेलले अधिवक्ता डा नारायणदत्त कँडेल (बागलुङ) लाई महान्याधिवक्तामा नियुक्त गर्नुभएको हो । राष्ट्रपतिको कार्यालयका अनुसार नेपालको संविधानको धारा १५७ को उपधारा २ बमोजिम प्रधानमन्त्री वालेन्द्र शाहको सिफारिसमा उहाँलाई आइतबार नियुक्त गरिएको राष्ट्रपति कार्यालयले जनाएको हो ।

महान्यायाधिवक्ता सरकारको कानुनी सल्लाहकारका रुपमा रहने गर्छन् । सरकारवादी मुद्दामा प्रतिरक्षा गर्ने मुख्य जिम्मेवारी महान्यायाधिवक्ताको हो । उहाँ रास्वपा सभापति रवि लामिछानेका कानुन व्यवसायी हुनुहुन्थ्यो । बागलुङको काठेखोला गाउँपालिका-५ का कँडेलले बेलायतबाट ‘अभिव्यक्ति स्वतन्त्रता’मा विद्यावारिधि गर्नुभएको छ । उहाँले विद्यावारिधि बेलायतको क्विन्स विश्वविद्यालयबाट गर्नुभएको हो ।

नवनियुक्त महान्याधिवक्ता डा कँडेललाई सर्वोच्च अदालतका कायममुकायम प्रधानन्यायाधीश सपना प्रधान मल्लले आइतबार नै पद तथा गोपनीयताको शपथग्रहण गराउनुभएको छ ।