नेपाली प्रतिभा प्रतिष्ठान बेलायतद्वारा किराती र चौधरीलाई सम्मान तथा पुरस्कार

काठमाडौँ । यस वर्षको ‘प्रतिभा विशिष्ट सम्मान–२०२५’ वरिष्ठ कवि जसराज किरातीलाई र ‘प्रतिभा पुरस्कार–२०२५’ युवा कवि तथा आख्यानकार विजेता चौधरीलाई प्रदान गरिएको छ ।

नेपाली भाषा, साहित्य र सिर्जनशीलतालाई प्रवासबाटै प्रवर्द्धन गर्दै आएको नेपाली प्रतिभा प्रतिष्ठान बेलायतद्वारा सोमबार काठमाडौंमा आयोजित’प्रतिभा सम्मान तथा पुरस्कार समर्पण समारोह–२०२५’ मा किराती र चौधरीलाई पुरस्कृत गरिएको हो । कार्यक्रमका प्रमुख अतिथि वरिष्ठ कवि तथा मुन्धुमविद् बैरागी काइँला र सभाध्यक्ष संस्थाका उपाध्यक्ष मिजास तेम्बे रहनुभएको थियो । प्रमुख अतिथि काइँलाले सम्मान तथा पुरस्कार अर्पण गर्नुभएको थियो । सम्मान तथा पुरस्कारमा नगद १ लाख रुपैयाँ, सम्मानपत्र, दोसल्ला र मालासहित समर्पण थैली प्रदान गरिएको थियो ।

प्रमुख अतिथि काइँलाले भन्नुभयो, ‘प्रवासबाट पनि सिर्जनालाई सम्बल दिँदै र प्रतिभालाई अन्तर्राष्ट्रिय पहिचान दिलाउँदै नेपाली साहित्यको समृद्धिमा संस्थाले विशिष्ट योगदान दिएको छ ।’ उहाँले किरातीलाई भूइँ मानिसको पीडा र मुन्दुमीय चेतनालाई साहित्यमा उतार्ने अद्वितीय स्रष्टा तथा चौधरीलाई मधेसी समाजको जीवन–संवेदना र भविष्यको आशा बोकेकी उदीयमान प्रतिभाका रूपमा उच्च मूल्यांकन गर्नुभयो ।

किरातीले सम्मान ग्रहणपछि भावुक हुँदै भन्नुभयो, ‘यो सम्मान पाउँदा बढो हर्ष लागेको छ । अझै बाँचेर केही गर्न पाए हुन्थ्यो भन्ने लागेको छ ।’

पुरस्कृत विजेता चौधरीलेले भन्नुभयो, ‘मैले कल्पना पनि नगरेको पुरस्कार पाउँदा निकै खुसी लागेको छ । यो पुरस्कारले मातृभाषा र मधेशलाई सम्मान गरेको छ ।’

कवि श्रवण मुकारुङले सम्मान तथा पुरस्कार चयन प्रक्रिया पारदर्शी र लोकतान्त्रिक लागेको बताउनुभयो । उहाँले भन्नुभयो, ‘कहिलेकाहीँ पुरस्कार छनोटमा पनि हिंसा हुने गर्दछ । तर, प्रतिभा प्रतिष्ठानको प्रक्रिया भने निष्पक्ष र अनुकरणीय रहेछ ।’

कार्यक्रममा पूर्वअध्यक्ष गणेश राईले स्वागत मन्तव्य प्रस्तुत गर्नुभएकव थियो । डा.तुलसी गौतमले दुवै प्रतिभाको परिचय प्रस्तुत गर्नुभएको थियो । कार्यक्रम शशी लुमुम्बूले सञ्चालन गर्नुभएको थियो ।