विमल गुरुङ कृति पुरस्कारका लागि कृति आह्वान

काठमाडौं । विमल गुरुङ कृति पुरस्कारका लागि कृति आह्वान भएको छ ।

सुनसरीको धरान–१८ बुद्धचोकस्थित कवि विमल गुरुङ स्मृति पुस्तकालयले नगद राशि दुई लाख रुपैयाँको ‘कवि विमल गुरुङ कृति पुरस्कार’का लागि कृति र ३५ औं राष्ट्रिय कविता महोत्सवका लागि कविता आह्वान गरेको हो ।

पुस्तकालय संचालन समितिको मंगलबारको बैठकले कृति पुरस्कारका लागि पुस्तक आव्हानसँगै ३५ औं राष्ट्रिय कविता महोत्सवका लागि कविता पनि आह्वान गरेको छ । पुस्तकालयका संरक्षक अध्यक्ष पूर्णबहादुर गुरुङकाअनुसार पुस्तकालयमा औपचारिक रुपमा दर्ता भएका कृतिहरूमध्ये निर्णायक मण्डलले श्रेष्ठ ठहराएका एक पुस्तकलाई विमल गुरुङ कृति पुरस्कार प्रदान गरिने छ ।

श्रेष्ठ ठहरिको कृतिका कृतिकारले नगद राशि २ लाख रुपैयासहित ताम्रपत्र र दोसल्लाले सम्मान गरिने अध्यक्ष गुरुङले बताउनुभयो । यसैगरी कविता महोत्सवमा उत्कृष्ट ठहरिएका कविताहरूमध्ये प्रथमलाई स्वर्ण पदकसहित २१ हजार रुपैयाँ, दोस्रोलाई रजत पदकसहित १९ हजार रुपैयाँ र तेश्रोलाई कास्य पदकसहित १८ हजार रुपैयाँ प्रदान गरिने छ ।

कृति पुरस्कारका लागि पुस्तकालयमा २०८२ साल भरी प्रकाशित सवैखाले (आख्यान र गैरआख्यान) विद्याका लागि खुला गरिएको छ । नेपाल र अन्य मुलुकमा बस्ने लेखक, कवि साहित्यकारहरुले नेपाली भाषामा लेखिएको चारप्रति पुस्तक र कविता महोत्सवमालागि कविताहरु ०८३ साल असोज १५ गते भित्र धरान–१८ बुद्धचोकस्थित विमल गुरुङ स्मृति पुस्तकालयमा दर्ता गरिसक्नु पर्ने प्रावधान राखिएको अध्यक्ष गुरुङले बताउुनयभो ।

कविता महोत्सवमा भाग लिनका लागि पुस्तकालयको आधिकारिक इमेल [email protected] मा पठाउनु पर्ने पुस्तकालय संचालक समितिले जनाएको छ ।

संचालक समितिकाअनुसार विमल कृति पुरस्कार र कविता महोत्सवमा विजेता कविहरुलाई आगामी कातिक १९ गते आयोजना हुने कवि विमल गुरुङको ५५ औं जन्मजयन्ती तथा ३५ औं राष्ट्रिय कविता महोत्सवमा पुरस्कार प्रदान गरिने जनाइएको छ ।