साहित्यकार हितानद्वारा आमाको स्मृतिमा ‘पर्या-साहित्य पुरस्कार’ घोषणा

काठमाडौँ । बेलायत निवासी साहित्यकार विजय हितानले आमाको स्मृतिमा एक लाख राशिको ‘पर्या-साहित्य पुरस्कार’ घोषणा गर्नुभएको छ ।

नेपाली पर्या-साहित्य प्रतिष्ठानका अध्यक्ष, लेखक हितानले ११औँ वातावरण गोष्ठीको विशेष समारोहमा आमा प्रेमकुमारी हितानको स्मृतिमा ‘प्रेमकुमारी हितानः पर्या-साहित्य पुरस्कार’ स्थापना गरेको घोषणा गर्नुभएको हो । उक्त पुरस्कार पहिलोपटक २०८४ सालमा आयोजना हुने १२औँ वातावरण साहित्य गोष्ठीको अवसर पारेर प्रदान गरिनेछ ।

वातावरण संरक्षण तथा वातावरणीय साहित्य सिर्जना, अनुसन्धान, प्रवर्द्धन र विकासमा उल्लेखनीय योगदान पुर्‍याएका विशिष्ट व्यक्तित्वलाई पुरस्कार प्रदान गरिने जनाइएको छ ।पुरस्कार छनोट प्रक्रिया निष्पक्ष र विश्वसनीय बनाउन स्वतन्त्र विज्ञ समितिको गठन गरिने तथा सोही समितिको सिफारिसका आधारमा पुरस्कार विजेता चयन गरिने जनाइएको छ ।

विजय हितान नेपाली पर्या-साहित्य प्रतिष्ठानका अध्यक्ष हुनुका साथै नेपाली साहित्यका सक्रिय सर्जक तथा सम्पादकका रूपमा परिचित हुनुहुन्छ । उहाँका ‘बिछोड अघिको रात’ (२०६७), ‘थकित पृथ्वी’ (२०७०), ‘लाहुरेको रेलिमाई’ (२०८०), ‘ब्लु प्लानेट’ (२०७८), ‘मलाई आर्यघाट लगेर नजलाउनू’ (२०८२) आदि गरी झन्डै १ दर्जन पुस्तक लेखन तथा सम्पादन गर्नुभएको छ ।

हितानले वातावरणीय साहित्यलाई संस्थागत रूपमा प्रोत्साहन गर्न पुरस्कार स्थापना गरिएको बताउनुभयो ।