नागरिकता र मताधिकारबारे गृहमन्त्री अर्याललाई सीएनसीबीजी युके र भूपूसैकस नेपालको ज्ञापनपत्र

लन्डन । ब्रिटिस गोर्खा नेपाली नागरिकता निरन्तरता (सीएनसीबीजी) र भूपू सैनिक कल्याणकारी समिति (भूपूसैकस)नेपालले बेलायतमा बस्ने नेपालीहरुको वंशजको नागरिकता निरन्तरता र विदेशमा रहेका नेपालीहरुले नागरिकता देखाएर भोट हाल्न पाउने व्यवस्था मिलाउन नेपाल सरकारसँग माग गरेका छन् ।

शुक्रबार ५ डिसेम्बर २०२५ (२०८२ मङ्सिर १९ गते) भूपूसैकसमितिनेपाल र सीएनसीबीजीको तर्फबाट अन्तरिम सरकारका गृहमन्त्री ओमप्रकाश अर्याललाई सिंहदरबार पुगेर ज्ञापनपत्र बुझाइएको भूपू सैनिक कल्याणकारी समिति नेपालका अध्यक्ष हुमबहादुर थापा मगरले जानकारी दिनुभयो । ‘बेलायत (विदेश)मा बस्ने नेपालीहरुको वंशजको नागरिकता निरन्तरता र विदेशमा रहेका नेपालीहरुले नागरिकता देखाएर भोट हाल्न पाउने व्यवस्था मिलाउन सरकारलाई दबाब दिइयो,’ज्ञापनपत्र बुझाएपछि अध्यक्ष थापामगर भन्नुभयो ।

गृहमन्त्री अर्यालले आफूहरुले राखेका विषयमा सरकार गम्भीर रहेको बताएको उहाँले जानकारी गराउनुभयो ।

गृहमन्त्री अर्यालले ब्रिटिस गोर्खाहरु त्रिपक्षीय सन्धिअन्तर्गत बेलायती सेनामा सेवा गरेकाले नेपाल सरकार उनीहरूको नागरिकता निरन्तरताको सुनिश्चित गर्नुपर्नेमा सकारात्मक रहेको समेत बताउनुभएको थियो । उहाँले भन्नुभएको थियो,’त्यसका लागि के कति गर्न सकिन्छ मेरो तर्फबाट मैले सक्दो सहयोग गर्नेछु ।’
ज्ञापनपत्र समितिका सचिव तथा वरिष्ठ अधिवक्ता चेत आलेले पढेर सुनाउनुभएको थियो । त्यसपछि अध्यक्ष थापामगरले गृहमन्त्री अर्याललाई हस्तान्तरण गर्नुभएको थियो ।

प्रतिनिधिमण्डलको नेतृत्व अध्यक्ष थापाले गर्नुभएको थियो भने समितिका सचिव तथा वरिष्ठ अधिवक्ता आलेमगर, कोषाध्यक्ष खुनबहादुर राना साथै सीएनसीबीजीबाट पूर्णबहादुर राना, प्रितीमाया पुन, प्रितम घले र अम्बिकाकुमारी मगर सहभागी हुनुहुन्थ्यो ।

गृहमन्त्रीसँगको भेटपछि सीएनसीबीजीका अध्यक्ष थर्क रानाले यो महत्वपूर्ण भेटघाटको सम्पूर्ण व्यवस्था मिलाउने भूपूसैकस नेपालका अध्यक्ष थापा र सचिव आले साथै व्यस्तताको बाबजुद पनि आफूहरुका मागलाई सकारात्मक रूपमा लिई सहयोगको आश्वासन दिएकोमा गृहमन्त्रीलाई धन्यवाद दिनुभएको छ ।