रामेश्वर खनाल, कुलमान घिसिङ र ओमप्रकाश अर्याल मन्त्रीमा नियुक्त, जिम्मेवारी के-के ?

काठमाडौं । पूर्वअर्थसचिव रामेश्वर खनाल, नेपाल विद्युत् प्राधिकरणका पूर्वकार्यकारी निर्देशक कुलमान घिसिङ र अधिवक्ता ओमप्रकाश अर्याल मन्त्री नियुक्त हुनुभएको छ ।

आन्दोलनकारी जेनजीसँगको परामर्शपछि प्रधानमन्त्री सुशीला कार्कीले आइतबार खनाल, घिसिङ र अर्याललाई नियुक्त गर्नुभएको हो । नवनियुक्त मन्त्रीत्रयले सोमबार शितल निवासमा राष्ट्रपति रामचन्द्र पौडेलसमक्ष पद तथा गोपनियताको शपथग्रहण गर्नुभएको छ ।

खनाललाई अर्थमन्त्री र घिसिङलाई ऊर्जासहित भौतिक पूर्वाधार तथा यातायात र सहरी विकास र अर्याललाई गृह तथा कानुन, न्याय तथा संसदीय मामिला मन्त्रालयको जिम्मेवारी तोकिएको छ ।

खनाल र घिसिङ दुवै विगतमा पाएको जिम्मेवारीमा सुशासन कायम गर्ने अधिकारीका रूपमा चिनिनुहुन्छ । जेनजी आन्दोलनपछि आन्दोलनको मागलाई निष्कर्षमा पुर्‍याउन अधिवक्ता अर्यालले भूमिका खेल्नुभएको छ ।

जेनजी आन्दोलनको मागअनुसार पूर्वप्रधानन्यायाधीश कार्की शुक्रबार अन्तरिम सरकारको प्रधानमन्त्री नियुक्त भएकी हुनुभएको हो ।