बेलायतले भन्यो – ‘नेपालमा नयाँ अन्तरिम सरकार गठन महत्त्वपूर्ण कदम’

लन्डन । संयुक्त अधिराज्य बेलायतले नेपालमा गत हप्ताको घटनाक्रमपछि सुशीला कार्की प्रधानमन्त्री पदमा नियुक्त भएको विषय महत्वपूर्ण कदम भनी उल्लेख गरेको छ ।

पूर्वप्रधानन्यायाधीश कार्कीले शुक्रबार अन्तरिम प्रधानमन्त्रीको जिम्मेवारी सम्हालेलगत्तै यहाँस्थित बेलायती दूतावासले सामाजिक सञ्जाल फेसबुकमार्फत सो प्रतिक्रिया दिएको हो । काठमाडौंस्थित बेलायती दूतावासद्वारा जारी विज्ञप्तिमा कार्कीको नियुक्तिका सन्दर्भमा भनिएको छ, ‘गत साता दुःखद् रूपमा मानव जीवनको क्षति, घाइते र सम्पत्तिको नोक्सानी हुने गरी भएको घटनापछिको यो एउटा महत्त्वपूर्ण कदम हो ।’

बेलायतले सबैभन्दा पुरानो मित्रको रूपमा आगामी चुनौतीहरूलाई स्वीकार गर्दै जवाफदेहीता र समावेशी शासनका लागि नेपाली आकाङ्क्षालाई समर्थन गर्ने जनाएको छ ।

जेनजी समूहको सिफारिसमा कार्कीलाई शुक्रबार राष्ट्रपति रामचन्द्र पौडेलले प्रधानमन्त्रीमा नियुक्त गर्नुभएको हो । निवर्तमान केपी शर्मा ओलीले सामाजिक सञ्जालमा प्रतिबन्ध लगाएपछि २३ भदौमा जेनजी समूहले काठमाडौं उपत्यकासहित देशका विभिन्न जिल्लामा प्रदर्शन गरेका थिए । बानेश्वरमा प्रदर्शनकारीले निषेधाज्ञा तोडेपछि प्रहरीले बल प्रयोग गर्दा १९ जना युवाले ज्यान गुमाए । सरकारी दमनको विरोधमा २४ गतेको आन्दोलन हिंसात्मक बनेपछि देशका महत्वपूर्ण क्षेत्रमा रहेका भौतिक संरचनासहित नेताहरुका घर र व्यापारिक भवनहरुमा क्षति पुर्‍याइएपछि प्रधानमन्त्री ओली राजीनामा दिन बाध्य हुनुभएको थियो ।

देश नेतृत्वविहीन भइरहेकोमा जेनजीको माग अनुसार प्रतिनिधिसभा विघटन र गैरदलीय सरकार निर्माणको माग शुक्रबार पूरा भएको हो ।