नेपालमा ‘जेनजी’ आन्दोलनले उग्र रुप लियो : कांग्रेसबाट गृहमन्त्री, मन्त्री बनेकाहरुको धमाधम राजीनामा

काठमाडौँ ।’जेन जेड’को नाममा सोमबार भएको प्रदर्शनका क्रममा १९ जनाले ज्यान गुमाएपछि कांग्रेसबाट गृहमन्त्री बनेका रमेश लेखक र कृषिमन्त्री रामनाथ अधिकारीले राजीनामा दिनुभएको छ ।

चौतर्फी आलोचनापछि गृहमन्त्री लेखकले सोमबार साँझ प्रधानमन्त्री निवास बालुवाटारमा बसेको मन्त्रिपरिषद् बैठकमा प्रधानमन्त्री केपी शर्मा ओलीसमक्ष राजीनामा बुझाउनुभएको हो । यस्तै मंगलबार कृषिमन्त्री रामनाथ अधिकारीले पनि पदबाट राजीनामा दिनुभएको छ । सोमबार भएको जेन–जी प्रदर्शनका क्रममा सरकारबाट तानाशाही व्यवहार प्रस्तुत भएको भन्दै मन्त्री अधिकारीले मंगलबार राजीनामा दिनुभएको हो ।

यसैबीच ‘जेनजी’को नाममा भइरहेको प्रदर्शन मंगलबार थप चर्किएको छ । काठमाडौं उपत्यकासहित नेपालका विभिन्न जिल्लामा आन्दोलन चर्किएको हो। मंगलबार बिहानैदेखि आन्दोलनमा उत्रिएकाहरुले प्रधानमन्त्री केपी शर्मा ओलीको राजीनामादेखि विभिन्न माग गरिरहेका छन् । आक्रोशित भिडले मन्त्री र नेताका घरघरमा आगजनी र तोडफोड गरेका छन् । ढोलाहिटीस्थित संचारमन्त्री पृथ्वीसुब्बा गुरुङको घरबाहिर प्रदर्शनकारीहरुले नाराबाजी गरिरहेका छन् । काठमाडौं उपत्यका प्रहरी कार्यलयका अनुसार मन्त्री गुरुङको घरबाहिर नारावाजी चलीरहेको छ । त्यहाँ सुरक्षाकर्मीको बाक्लो उपस्थिति देखिन्छ ।

जिल्ला प्रशासन कार्यालय काठमाडौंले आज बिहान साढे ८ बजेदेखि लागू हुनेगरी चक्रपथ क्षेत्रभित्र कर्फ्यु आदेश जारी गरेका छन् । काठमाडौंका प्रमुख जिल्ला अधिकारी छविलाल रिजालले अर्को आदेश जारी नभएसम्मका लागि चक्रपथ क्षेत्रभित्र कर्फ्यु आदेश जारी गरिएको बताएका छन् । चक्रपथभित्रका बालकुमारी पुलदेखि कोटेश्वर चोक, सिनामंल, गौशाला, चाबहिल, नारायणगोपाल चोक, गोंगबु, बालाजु, स्वयम्भू, कलंकी, बल्खु हुँदै बागमती नदी पुलसम्मको चक्रपथभित्रको सम्पूर्ण भूभागमा कर्फ्यु लगाइएको प्रशासनले जनाएको छ ।

यस्तै जिल्ला प्रशासन कार्यालय ललितपुरले मंगलबार बिहान ९ बजेदेखि बेलुका ९ बजेसम्म कर्फ्यु लागू हुने गरी आदेश जारी गरेको छ । भक्तपुर लगायत जिल्लामा कर्फ्यु र निशेधाज्ञा जारी गरिएको छ ।

काठमाडौँ उपत्यकाको सुरक्षा व्यवस्थालाई कडा पारिएको छ । साथै सुरक्षा निकायलाई ‘हाइअलर्ट’ हुन निर्देश गरिएको छ । नेपाल प्रहरीका केन्द्रीय प्रवक्ता प्रहरी नायब महानिरीक्षक विनोद घिमिरेले देशभरका सुरक्षा निकायलाई सुरक्षा व्यवस्था कडा पार्न र शान्ति सुव्यवस्था खलल हुन नदिन निर्देशन दिइएको जानकारी दिनुभयो ।

जिल्ला सुरक्षा समितिमार्फत समन्वयात्मक रूपमा सुरक्षा व्यवस्था कडा पार्न सबै सुरक्षा निकायलाई भनिएको गृह मन्त्रालयले जानकारी दिएको छ । जेनजी पुस्ताको सोमबार भएको प्रदर्शनमा झडप समेत थियो । उपत्यकाका तीनै जिल्ल्ला काठमाडौँ, ललितपुर र भक्तपुरमा निश्चित क्षेत्र तोकेर निषेधाज्ञ जारी गरिसकिएको छ । गृह मन्त्रालयका प्रवक्ता आनन्द काफ्लेले काठमाडौँलगायत देशका विभिन्न भागमा भएको घटना र मानवीय क्षतिप्रति दुःख व्यक्त गर्नुभएको छ । उहाँले यस विषम अवस्थामा सम्पूर्ण युवा विद्यार्थी, अभिभावक, शिक्षक, नागरिक समाज साथै सरोकार भएकाले संयमता र धैर्यता अपनाउन र शान्ति कायम गर्न आग्रह पनि गर्नुभएको छ ।