यसरी हुँदैछ क्वीन्स एभिन्यू खेलकुद मैदानमा गोर्खा कपको तयारी

लन्डन । बेलायतवासी नेपाली समुदायको आकर्षक कार्यक्रममध्येको गोर्खाकपको अन्तिम चरणको तयारी भइरहेको छ । तमुधीं यूकेको आयोजनामा आइतबार २५ मेमा क्वीन्स एभिन्यू खेलकुद मैदानमा हुने गोर्खा कपको तयारी धमाधम चलिरहेको आयोजकले जनाएको छ । तीनदिनअघि देखि नै खेलकुद मैदानमा खटिँदै आएको आयोजक आज शनिबार भने बाक्लो संख्यामा ओरिएको छ ।

तमुधीं यूकेले मैदानमा बारबेर गर्ने, मार्किङ गर्ने, अतिथिको लागि बस्ने ठाउँ, मञ्च तयारी लगायत काम भइरहेको जनाएको छ । शनिबार तमुधीं यूकेका पदाधिकारी, सदस्यहरु र शुभचिन्तक गरी दुई सय भन्दा बढी मैदानमा खटिइरहेका छन् । साझा कार्यक्रम, साझा काम, तमुधीं यूकेको लोगो अंकीत एकथानका ट्र्याकसुट लगाएर आमा समूहसहितका आयोजक टोली तयारीमा जुटेको छ ।
खाजा, खाना मैदानम व्यवस्था गरिएको छ । जहाँ नेपालबाट आएका कलाकारहरुसमेत सहभागी छन् । २३ औं संस्करणको यसपटकको गोर्खाकप आइतबार बिहान ८ देखि साँझ ८ बजेसम्म हुने जनाइएको छ ।