मुकाहाङ लिम्बूले जिते १० हजार पाउण्डको बोरो प्रेस पुरस्कार

लण्डन । बेलायत निवासी युवा साहित्यकार मुकाहाङ लिम्बूले १० हजार पाउण्ड स्टर्लिङ राशीको ‘द बोरो प्रेस पुरस्कार’ जितेका छन् ।

करिब २५० जना प्रतिस्पर्धीलाई पछि पार्दै उनले सो पुरस्कार जितेका हुन् । यसका साथै उनले द बोरो प्रेसबाट पुस्तक प्रकाशनको सम्झौता पनि पाएका छन् ।

गत जनवरीमा एजेन्ट नभएका लेखकहरूबाट गैरआख्यान विधामा प्रतिस्पर्धा आह्वान गरिएको थियो । बेलायतको प्रख्यात टाइम्स पत्रिका र म्याडलिन मिलवर्न लिटरेरी एजेन्सीले सो प्रतियोगिता आयोजना गरेको हो ।

प्राप्त रचनाहरूमाथि निर्णय गर्न सम्पादक रोबी मिलेन, साहित्यिक एजेन्ट एमा बल, प्रकाशन संस्था हार्परकलिन्सका सम्पादन, बजार, बिक्री र प्रबर्धन कर्मचारीहरू रहेको एक निर्णायक मण्डल चयन गरिएको थियो । सो मण्डलले एकमतले लिम्बूको संस्मरण ‘एग फ्राइड राइस’लाई सर्वोत्कृष्ट ठहर्याएको हो ।  

साथै लिम्बूले एमा बललाई साहित्यिक एजेन्ट बनाउन पनि पाएका छन् । उनको पुस्तक ‘एग फ्राइड राइस’ सन् २०२७ मा प्रकाशन हुने बताइएको छ ।

“एग फ्राइड राइसमा मुकाहाङ लिम्बुले प्रायः अदृश्य डायस्पोराको पहिचान र विरासतको खोजी तथा लेख्ने अभ्यासले कसरी जीवनका लुकेका कथाहरूलाई बाहिर ल्याउन मद्दत गर्दछ भन्ने देखाएका छन्”, द बोरो प्रेसले भनेको छ ।

प्रतियोगिताको नेतृत्व गर्ने हार्परकोलिन्सका सहायक सम्पादक जबिन अलीले भनेका छन्, “बरो प्रेस आफ्नो सूचीमा फराकिलो आवाजको प्रतिनिधित्व गर्न प्रतिवद्ध रहेको र मुकाहाङ लिम्बुको लेखन भेट्टाउन पाउँदा धेरै उत्साहित छौं ।”

”एग-फ्राइड राइस गीतिमय र उत्तेजक गद्यको साथमा आउँदै गरेको युगको सुन्दर संस्मरण हो । हामी यसलाई प्रकाशित गर्न पाउँदा धेरै गर्व गर्छौं”, अलीले भने ।

पुरस्कारको घोषणापछि लिम्बुले भने, “गद्य लेख्नु मेरो लागि एकदमै नयाँ हो र कहिलेकाहीँ मैले आफ्ना शब्दहरूलाई कसरी ठूलो ठाउँमा राख्ने भनेर रुने गरेको छु । त्यसैले पुरस्कार पाएको सुन्दा आश्वस्त र हौसला मिलेको छ। यो पुरस्कार प्राप्त गर्न पाउँदा सम्मानित भएको महसुस गरेको छु।”

“सबै जनासँग सुनाउनको लागि केही बढी नै कथाहरू हुन्छन् । नेपाली समुदाय र मेरी आमासँग निश्चित रूपमा धेरै कथा छन् र म धेरै खुसी छु कि मैले आफ्नो अंश सुनाउने मौका पाएको छु”, उनले थपे ।

साहित्यिक एजेन्ट एमा बलले पुरस्कारको एक हिस्सा हुन पाउँदा धेरै खुसी लागेको र यो प्रक्रियामा मुकाहाङ लिम्बुको प्रतिभाशाली काम पत्ता लगाउन पाउँदा अझ खुसी लागेको बताएकी छिन् । मुकाहाङमा कवि मनको मिहिन र चन्चल लेखनशैली तथा कडा उर्जा रहेको बलको भनाइ छ । मुकाहाङको डेब्यू संस्मरणले बेलायतमा नेपाली समुदायका बारेमा अनौठो सारांश प्रस्तुत गर्ने तथा प्रसिद्ध विश्वविद्यालय रहेको  अक्सफोर्ड शहरमा श्रमिक वर्गमा हुर्किँदा कस्तो हुन्छ भन्ने पनि देखाउने उनको ठहर छ ।

पूर्व गोरखा सैनिकका पुत्र लिम्बु बेलायती-नेपाली लेखक हुन् । उनले अक्सफोर्ड विश्वविद्यालयको क्वीन्स कलेजबाट स्नातक गरेका छन् ।  उनले तीन पटक फोयल युवा कविको उपाधि जितिसकेका छन् । उनले फर्स्ट स्टोरी कम्पिटसिन र आउट-स्पोकन पुरस्कार पनि पाइसकेका छन् । उनी बेलायतको न्याशनल पोइट्री कम्पिटिसन र र फर्वार्ड पुरस्कारको लागि पनि अन्तिम सूचीमा परिसकेका छन्। उनका कविताहरू इङ्गल्याण्ड: पोम्स फ्रम ए स्कूल (पिकाडोर, २०१८), पोएट्री लन्डन, द सन्डे टाइम्स र विभिन्न प्रमुख संयुक्त कवितासंग्रहहरूमा प्रकाशित भएका छन्। उनको पहिलो पम्फलेट ‘मदर अफ फ्लिप-फ्लप्स’ (आउट-स्पोकन प्रेस, २०२२) द पोएट्री बुक सोसाइटीको पम्फ्लेट च्वाइसको रूपमा छनोट भएको थियो । उनले एरिक ग्रेगरी पुरस्कार र हार्पर-वुड पुरस्कार पाइसकेका छन् ।