चलचित्र ‘काँडेतार’का निर्माता तथा अभिनेता यूकेमा सम्मानित

लन्डन । नेपाली चलचित्र ‘काँडेतार’का निर्माता सत्यकला राई तथा अभिनेता नवल खड्कालाई खस समाज यूकेले सम्मान गरेको छ ।

साउथ ईस्ट लन्डनको प्लमस्टिडस्थित क्याप्रिकन रेस्टुराँमा एक समारोहबीच निर्माता र अभिनेतालाई ‘बलिराज सम्मान-२०८१’ द्वारा सम्मानत गरिएको हो । उहाँहरुलाई प्रमुख अतिथि साउथ ईस्ट लन्डन रोयल बरो अफ ग्रीनवीचका मेयर जित रानाभाट, खस अन्तर्राष्ट्रिय समन्वय समाजका केन्द्रीय संयोजक टेकबहादुर थापा, खस समाज यूकेका सल्लाहकार राजेन्द्र खस र नेपाल आदिवासी जनजाति महासंघ यूकेका निवर्तमान अध्यक्ष कर्मा पहाडी शेर्पाले संयुक्त रुपमा खादा तथा सम्मानपत्र प्रदान गर्नुभएको थियो ।

कार्यक्रममा सम्बोधन गर्नुहुँदै साउथ ईस्ट लन्डन रोयल बरो अफ ग्रीनवीचका मेयर जित रानाभाटले चलचित्र ‘काँडेतार’को मुक्तकण्ठले प्रशंसा गर्नुभएको थियो ।

यस्तै खस समाजका अन्तर्राष्ट्रिय संयोजक टेकबहादुर थापाले नेपाली चलचित्र र कलाको माध्यमबाट नेपाली समाजलाई पुर्‍याएको योगदानको उच्च मूल्याङ्कन गर्दै कलाकारद्वयलाई सम्मान गरिएको बताउनुभयो ।

उक्त अवसरमा चलचित्र काँडेतारको विशेष शो गोर्खा क्याप्रीकनको हलमा देखाइएको थियो । चलचित्र काँडेतार यथार्थपरक र राष्ट्रप्रेमले ओतप्रोत कथावस्तुमा आधारित भएकाले चलचित्र उत्कृष्ट रहेको कार्यक्रम संयोजक नायक, निर्माता एवं निर्देशक मनिस श्रेष्ठले दाबी गर्नुभयो । चलचित्र ‘काँडेतार’यूकेमा अल्डरसट, आशफोर्ड, स्वीडन, बेजिङस्टोक, साउथह्यारो लगायतका दर्जन ठाउँहरुमा प्रदर्शन गरिएको चलचित्रका नायक नवल खड्काले जानकारी गराउनुभयो |

चलचित्र निर्मात्री तथा गायिका सत्यकला राईले आफ्नो देशलाई विदेशीभूमिमा चिनाउने उद्देश्यले निर्माण भएको चलचित्र ‘काँडेतार’प्रति यूकेवासी नेपालीहरुले देखाएको प्रेम र सद्भावबाट आफू अत्यन्तै हर्षित भएको बताउनुभयो । चलचित्र हेर्ने दर्शकहरुलाई थप मनोरञ्जन प्रदान गर्न सत्यकलाले आफ्ना चर्चित गीतहरु पनि गाउनुभएको थियो ।

नवल खड्का, गौरव पहाडी, रेविका गुरुङ, प्रशान्त यादव, सुरबिना कार्की, मुरलीधर, सन्जय खतिवडा, रोमियन लिम्बु, प्रेम सुब्बा, पर्शुराम चौधरी, पुष्प श्रेष्ठलगायत कलाकारको अभिनय रहेको छ ।