बेलायती राजाको जन्मोत्सवमा पूर्व गोरखा सैनिक हरि बुढामगरलाई पदवी

लण्डन । बेलायती राजा चार्ल्स तृतीयको जन्मोत्सवका अवसरमा बेलायतमा विभिन्न क्षेत्रमा योगदान पुर्याउने महानुभावहरूलाई प्रदान गरिएको पदवी पूर्व गोरखा सैनिक हरि बुढामगरले पनि पाएका छन् ।

शुक्रबार बेलुका सार्वजनिक गरिएको सो पदक पाउनेहरूको सूचीमा बुढामगरलाई अपाङ्गताका बारेमा जनचेतना फैलाएकोमा मेम्बर अफ अर्डर अफ ब्रिटिश एम्पायर (एमबीई*) पदवी प्रदान गरिने घोषणा गरिएको छ ।

रोल्पा मिरुलमा जन्मेका बुढाले बेलायती सैनिकमा कार्यरत हुँदा कामको सिलसिलामा सन् २०१० मा अफगानिस्तानको हेल्मण्डमा खटिएको बेला दुश्मनको एम्बुसमा परेर दुवै गोडा घुँडाभन्दा माथि गुमाएका छन् । सो दुर्घटनाबाट तङ्ग्रिएपछि उनले बेलायत लगायत विभिन्न स्थानहरूमा अपाङ्गता सम्बन्धमा रहेको परम्परागत मानसिकता हटाउन र अपाङ्गहरूलाई पनि केही गर्न सकिन्छ भनेर प्रेरणादायी प्रवचन दिने, साहसिक खेलमा सहभागी हुने, सामाजिक तथा व्यावसायिक कार्यमा सक्रिय छन् ।

बुढामगरले घुँडाभन्दामाथि गोडा गुमाएका व्यक्तिहरुमा सबैभन्दा पहिले विश्वको सर्वोच्च शिखर सगरमाथा आरोहण गरेकोमा गिनिस बुक अफ वर्ल्ड रेकर्ड पनि कायम गरेका छन् ।

बुढामगरले गत वर्ष मे १९ मा सगरमाथाको सफल आरोहण गरेका थिए ।

अहिले उनी सबै महादेशका अग्ला हिमाल चढ्ने अभियानमा छन् ।

*यसअघि ओबीई भएकोमा सच्याइएको छ।