चुनावमा होमियो बेलायत

लन्डन । बेलायतका प्रधानमन्त्री ऋषि सुनकले बुधबार साँझ जुलाई ४ मा आमनिर्वाचन गर्ने घोषणा गर्नुभएसँगै बेलायत चुनावी माहौलमा होमिएको छ ।
बुधबार साँझ बेलायती प्रधानमन्त्रीको कार्यालयमा उनले सम्बोधन गर्दै आमचुनावका लागि जुलाई ४ को दिन तोकिएको बताएका थिए ।
सुनकले वर्तमान संसद मे ३० मा भंग गर्न राजासमक्ष अनुरोध गरेको र स्वीकृति पनि पाइसकेको बताएका छन् ।
यसवर्षको अन्त्यसम्ममा आमचुनाव गर्नुपर्ने बाध्यात्मक अवस्था सुनकसँग रहे पनि उनले यो वर्षको दोस्रो अर्धवार्षिकमा चुनाव गर्ने बताउँदै आएका थिए । हिजै अफिस फर न्याशनल स्ट्याटिटिक्सले सार्वजनिक गरेको नयाँ तथ्याङ्कले देशमा मुद्रास्फीति दुई दशमलव तीन प्रतिशतमा झरेको देखाएको केही घण्टापछि प्रधानमन्त्री सुनकले नयाँ चुनावको घोषणा गरेका हुन् ।
विश्लेषकहरुले सोही तथ्यांक सुनकका लागि चुनावमा जाने सबैभन्दा सकारात्मक कडी भएको बताएका छन् । सन् २०२३ जनवरीमा सुनकले घोषणा गरेका पाँचवटा प्रतिज्ञामध्ये मुद्रास्फीति घटाउने पनि एक थियो । त्यसका साथै बेलायतको अर्थतन्त्रको वृद्धिदर अतिविकसित राष्ट्रहरु जी सेभेनको हाराहारीमा पुगेको पनि सुनकको दाबी छ ।
बुधबार चुनावको तिथि घोषणा हुने भएपछि बेलायती विदेश मन्त्री लर्ड क्यामरुन र रक्षा मन्त्री ग्रान्ट स्याप्सले विदेश भ्रमण रद्द गरेका थिए ।
बेलायतमा कन्जर्भेटिभ पार्टीले सन् २०१० देखि सरकार चलाउँदै आएको छ । तर पछिल्ला सर्वेक्षणहरुमा आगामी चुनावमा कन्जर्भेटिभभन्दा हाल प्रमुख प्रतिपक्षी लेबर पार्टी अगाडी देखिएको छ ।
चुनाव आउन करिक ६ साता बाँकी रहेकाले राजनीतिक दलहरु तीव्रताका साथ चुनावमा होमिएका छन् ।