लण्डन । बेलायतको युनिभर्सिटी अफ डण्डीमा प्राध्यापनरत प्राध्यापक डा गोपाल सापकोटालाई बायोसाइन्स विषयमा विश्वमै प्रतिष्ठित अवार्ड प्रदान गरिने भएको छ ।
द बायोमेडिकल सोसाइटीले वर्षेनी प्रदान गर्ने द इन्ड्रष्टी एण्ड अकाडेमिक कोलाब्रेसन अवार्ड यसवर्ष वैज्ञानिक सापकोटालाई प्रदान गरिने भएको हो ।
सन् १९११ मा स्थापना भएको सोसाइटीले बायोसाइन्स, उद्योग र प्राज्ञिक क्षेत्रको बहसमा असाधारण योगदान गर्ने विश्वभरका समूह वा व्यक्तिलाई विभिन्न विधाहरुमा त्रैवार्षिक, द्वैवार्षिक र वार्षिक रुपमा यस्तो अवार्ड प्रदान गर्ने गरेको छ ।
यस वर्ष विश्वभरबाट प्राप्त नोमिनेसनहरुबाट १५ जनाले यस्तो अवार्ड पाउँदैछन् । अवार्डमा नगद राशीसमेत रहेको छ ।
अवार्ड घोषणाको समाचार प्राप्तभएपछि प्राध्यापक सापकोटाले प्रख्यात अवार्ड पाएकोमा हर्ष लागेको बताएका छन् । उनले आफूले कति औषधि निर्माताहरुसित गरेको सहकार्यको कदर भएको बताएका छन् । साथै प्रयोगशालामा कठोर मिहिनेत गर्ने विद्यार्थी र पोष्ट डक्टरेट अभ्यास गर्ने व्यक्तिहरुको वर्षौँको मिहिनेतको पनि कदर भएको बताएका छन् ।
अवार्ड आगामी दिनमा औषधि आविष्कारको सहकार्य गर्न र यस क्षेत्रका सिकारुहरुलाई प्रख्यात औषधि निर्माता कम्पनीहरुसित सहकार्य गर्न प्रेरणा मिल्ने विश्वास उनले व्यक्त गरेका छन् ।
नेपालमा जन्मी, शिक्षादीक्षा पाएका सापकोटा ब्रिटिश काउन्सिलको छात्रवृत्ति पाएर बेलायत आएका थिए । उनले छात्रवृत्तिमा बाथ विश्वविद्यालयमा बायोकेमिष्ट्री विषय अध्ययन गरेका थिए । उनले युनिभर्सिटी अफ डण्डीबाट विद्यावारिधि गरेका छन् भने न्यूयोर्कको स्लोन केटरिङ क्यान्सर सेन्टरमा पोष्ट डक्टरेट गरेका छन् । सन् २००८ देखि युनिभर्सिटी अफ डण्डीमा आएका उनी हाल स्कुल अफ लाइफ साइन्सेजमा प्राध्यापक छन् ।
