डाक्टर सुदर्शन गुरुङ बने सोझै ब्रिटिश आर्मीको मेजर   

लण्डन । बेलायती सेनामा गोर्खाहरु विगत दुईसय आठवर्षदेखि सिपाहीँमा भर्ती भएर सेवाकालमा अफिसर तहमा पुगेर सेवा निवृत्त हुँदै आएका छन् । पछिल्लो समयमा गोर्खाली मूलका छोराहरू सीधै ब्रिटिश आर्मीको क्याप्टेन तहबाट सेवा शुरु गर्दै आएका पनि छन् तर डा सुदर्शन गुरुङ भने सीधै मेजर पदमा बेलायती सेनामा भर्ती भएका छन् ।

उनी सम्भवत गोर्खा समुदायबाट मेजर तहमा कमिशन प्राप्त गर्ने नेपाली मूलका पहिलो व्यक्ति हुन् ।

बुवा सुमलकुमार गुरुङ र आमा सारादेवी गुरुङको कोखबाट पर्वत जिल्ला मोदी गाउँपालिका वडा नम्बर ८, चित्रेमा सन् १९८७ सालमा जन्मेका सुदर्शन गुरुङले सैन्य सेवाको शुरुमा गर्नुपर्ने तालिम सम्पन्न गरी हालै दीक्षित भएका छन् ।

सन् २०१० सालमा नेपाल मेडिकल कलेजबाट एमबीबीएस पास गरेर सन् २०१२ मा उनी बेलायत आएका थिए । बेलायतमा उनी चिकित्सा सेवामा सेवा गर्दै एमआरसीपी (एमडी) तह र त्यसपछि एफआरसीपी (ह्यामोटोलोजी) को कन्सल्ट्यान्ट (विशेषज्ञ) तहको अध्ययन पूरा गरेर चिकित्सा क्षेत्रमा कार्य गर्दै आएका थिए ।

उनी सेनामा भर्ती हुनुअघि केन्टस्थित मिडवे अस्पताल, जिलिङहाममा क्यान्सर विभाग प्रमुखका रूपमा कार्यरत थिए ।

गुरुङ आफ्नो अध्ययन र सेवाबाहेक सामाजिक कार्य र संगीतमा पनि उत्तिकै सक्रिय छन् । उनको नेतृत्वमा बेलायती नेपाली समुदायलाई लाभ पुर्याउने विभिन्न चिकित्सकिय कल्याणकारी कामहरु भइसकेको छ । नेपालको महाभूकम्पको बेला डा कपिल रिजालसहित डाक्टरहरुको समूहमा अघिल्लो पङ्क्तिमा उभिएका गुरुङले बेलायतमा स्वास्थ्य शिविरहरुको कार्यक्रमहरुमा सक्रिय भूमिका निभाउँदै आएका छन् । उनले आफ्नै प्रयासमा नेपालको मुसहर बस्तीमा स्वास्थ्य शिविरको आयोजना गरेर गरिब निमुखाहरुको लागि निःशुल्क सेवा र औषधि उपलब्ध गराएका थिए ।